Shillong, Jymmang 27: Ka Synjuk Ki Nongsynshar Shnong Maweit Area (SKNSMA) ka la pynpaw ia ka jingsngewkmen kaba khraw ia ka skul St. Mary Secondary School Maweit, West Khasi Hills kaba la wanrah burom ha ka sien ba nyngkong eh ba ki khynnah kin pas bha na kane ka skul ha ka exam matrik kaba dang shu dep pynbna da ka MBOSE.
“Ka long ka jingsarong ia ka skul bad ki khynnah skul kiba la trei shitom ban minot ia ka jingpule ryngkat ki nonghikai kiba la aiti met bad mynsiem ban hikai haduh ba kin poi sha ka kyrdan ba shakhmat eh, ha kaba hynriew ngut ki la pas ia ka kyrdan 1st Division ha kane ka snem,” ula ong u Bah O Thongni, President ka synjuk bad ba kine ki khynnah ki la wanrah burom ym tang ia ka iing ka sem hynrei khamtam ia ka skul bad ka dong ka thain hi baroh kawei.
U Bah Thongni ula iathuh ba ha kane ka snem ki khynnah na katei ka skul ki la pas haduh khadhynriew ngut kynthup hynriew ha ka 1st Division, 4 ngut second division bad kiwei. Kiba la wan shakhmat eh ka ki long u Arnes Nongsiang uba la ioh distintion saw subject (74%) u Khraw Kupar Byrsat (73%), John Paul Nongbri (73%) bad kiwei kiwei.
Na ka liang ka synjuk, ka ai khublei kitbok kitwriang ia ki khynnah baroh kiba la pas ha kane ka exam SSLC bad kumjuh ruh ia kito kiba bym shym la pas ba kin iai minit ban pule ban wan shakhmat kumba ki kmie ki kpa ki la trei shitom na bynta jongki ban pynioh ia ka jingnang ka jingstad.
Halor kane ka synjuk ka sa pynlong ia ka jingialang ban pynkup burom ia kitei ki khynnah kiba la pas bha kum ka dak ban ai mynsiem ba kin nangiai bteng ban trei shitom ha ki kyrdan pule ba shakhmat.(SP News)
