Jowai,rymphang,12: Ka Seng Hynniewtrep Achik Natioanal Movement (HANM) Seng kmie , ha ka kyrwoh khubor ba la phah da u General Secretary u bah Damonmi S Dkhar, ka la dawa jur na ka sorkar jylla ba ka dei ban pyllait noh mardor ia u bah Arphul Kharbuni u ba dei u President jong ka HANM West Khasi Hills District, uba la shah kem la sa saw bnai tam, baroh shi katta ka seng ka dang leit ban kyrpad ia ka sorkar ban pynlait ia u na ka kyndon MPDA, hynrei ka sorkar kam shem la leh ia kata dei na kane ka daw ka seng ka la dawa ba ka sorkar ka dei ban pynlait noh mardor ia u tei u nongialam ka seng uba la shah set byndi baroh shi katta.
Ka seng ka pyrshah jur ruh ia ka jingleh jong ki Pulit kiba la kem bad pynngad MPDA ia u tei u nongialam ka seng, namar une um dei u riew sniew ba u dei tang u nongialam ia ka jaitbynriew. Shuh shuh ruh ha ka por ba don ka jingiakhih jong ka seng sha West Khasi Hills une u samla um don wat tang ha poh jylla ruh hynrei u don sha bar Jylla bad kaba pynlyngngoh haduh katta katta ba ka sorkar kan pynngat ia u haduh katei ka kyndon bad ruh ia kiwei kiwei ka sorkar ka la dep weng lut hynrei balei sa tang ia u bah Arphul Kharbani ki dang iai bat sah ia u haduh mynta.
Te halor kane ka nongrim ka seng ka dawa jur ban pynllait noh ia u mardor hapoh kine ki khyndiat sngi lymkumta ka jylla kan mad ia ki jingiakhih kiba tyngeh, ka seng ka ong lada ka sorkar kam sngap ia kane ka jingdawa kan pynthut wat ia kane ka Election MDC ka ban sa long shen ruh, pynkut ka kyrwoh na seng.(SP News)
