Shillong, Nailar 13: ki nongsynshar na kylleng ka bri Hynniewtrep, ha ka jingialang ka
ba la neh palat san kynta, kumba la rai ka Dorbar Grand Council of Chiefs of Meghalaya (kaba kynthup Ka Dorbar Ki Khlieh Nongsynshar Ka Ri Hynniewtrep, Federation of Khasi States, Ka Dorbar Ki Dolloi, Ki Sirdarship bad Council of Nokmas) ban pynlong ka jingiakynduh kumba la ia kut lang baroh ha ka sien kaba lai kaba shisien shisnem jong ki Nongsynshar naduh Dorbar Shnong, Dorbar Kur, Dorbar Raid haduh Dorbar Hima, ki Bakhraw, ki Longsan, ki President-Secretary Kur, Ki Rangbah Kur, Dorbar Shnong, Dorbar Raid, bad Dorbar Hima, kynthup ia ki Seng Samla Shnong, Seng Samla Hima, ki Seng Longkmie, ki Seng Bhalang, bad ki riewkhmat, ki la ia kynduh lang mynta ka sngi ha Khasi National Dorbar Hall, Mawkhar, Shillong, ban ia iakren, iaphylliew jingmut, bad ban iasyllok, halor ka jingdap hynriew phew san (65) snem (1948-2013) ki jingiateh bad ki jingkular naduh ka sngi ba soi bad mynjur bad soi hapdeng ka Sorkar India bad ki arphewsan Hima Khasi States, ia ki dulir jingiateh bad ki jingkular (Instrument of Accession and Annexed Agreement) ha ka 17 tarik August 1948.
Shwa ban sdang ka jingialang la ioh ka jingrwai Ri Khasi Ri Khasi. Hadien kane la plie ia ka jingialang da u Rangbah WHD Syngkon, Rangbah Shnong, Dorbar Shnong Mawkhar, u ba la pynlong ia ka ka jingsngap jar shi minit, kum ka dak ka jingkynmaw burom ia baroh ki Khlieh Nongsynshar kiba ha shwa kiba la khlad noh.
Hadien ka jingsngap jar, la pynher ia ka lama jong ka Federation of Khasi States da u Bah Harlinjai Skhemlon, Sirdar Hima Mawdon, bad Secretary, Federation of Khasi States.
Ha ka jingkren plie ia ka jingialang u Rangbah Shnong Mawkhar, u la pdiang burom iabaroh kiba la wan sha kane ka jingialang bad hadien ki jingkren kitbok kit rwiang, u la aiti ha u Bah John F Kharshiing, Co-Chairman, Meghalaya State Planning Board, Chairman, Grand Council of Chiefs of Meghalaya, bad Spokesperson, Federation of Khasi States, ba un pyniaid ia ka phang kaba la buh ha kane ka sngi.
Ha kane ka sngi u Paiem Niandro Syiemiong, Syiem Hima Maharam, bad President Federation of Khasi States u pyllait paidbah ia ka jingthoh ba la thoh da u Prime Minister ba nyngkong ka Ri India u (Late) Pandit Jawaharlal Nehru, kaba ia dei bad ka Instrument of Accession & Annexed Agreement, sha u (Late) Sardar Vallabhbhai Patel, Deputy Prime Minister, i/c Ministry of States, Ri India ha ka 13 tarik October 1947.
Katkum katei ka jingthoh la iohi shai ba ki Hima Khasi ki la don ka kyrdang kaba kyrpang hakhmat ka Ri India, bad dei halor kane ka jinglong kaba kyrpang jong ka Ri Khasi Jaintia kaba la pynlong ia ki bor jong ka Ri India ban mynjur ia ki kyndon kiba kyrpang ha kaba ia dei bad ka Ri jong ngi.
U Paiem Laborius Syiem, Syiem barim Hima Mylliem, bad Adviser, Federation of Khasi States, ha ka jingkren u la ong ba ka long kaba donkam ban pynkhlain ia ki san Dorbar, kita ki long Dorbar iing, Dorbar Kur, Dorbar Shnong, Dorbar Raid bad Dorbar Hima kiba long ki paia jong ka Ri bad ka jaidbynriew. U la ban jur ba dei ban don ka Dorbar Shnong kaba khlian.
Na ka liang u Bah John F Kharshiing, u la pynpaw ba ka jingthmu ban lum ia kum kane ka jingialang man ka snem ka long ban pynkynmaw ia baroh ia ka jingdonkam ban buddien ia kitei ki jingiateh tad haduh ba kin da paw dur ha kaba shai. U la ong ba baroh ki jingeh kiba ngi ia shem mynta kum ka jaidbynriew ha kane ka Ri ki mih namar ka jingsah teng ban pynbeit ia kitei ki jingiateh hapdeng ka Sorkar India bad ki Hima Khasi States, kat haduh ban da ioh ia ka Dorbar Thaw Ain ka Assembly lane ka Council jong ki ‘Khasi States’ kumba la sain dur da ki rangbah naduh ki snem 1933 bad ha kaba ki Khlieh Nongsynshar ki ia don lang ryngkat ha ka Dorbar Assembly lane Council jong ka Ri India bad hapoh ka jylla.
U la ong ha kawei ka liang ngi la dep ioh ia ka jingmynjur jong ka Ri India halor ka Khasi State, hynrei ha kawei ka liang ym pat lah ban pyndep ia kitei ki jingkular ban wanrah ia ka Assembly lane ka Council jong ki Hima Khasi States, bad kane ka wanrah ia ka jingeh ha kaba iadei bad ki khun ki hajar jong ka bri Hynniewtrep.
U la ong ba ka kam ka khia, u la khot ia baroh ban ia snoh kti lang khlem kano kano ka jingsngewpher na ka bynta ka Ri bad ka jaidbynriew khnang ba kane ka kam kan ioh ia kitei ki Hok jong ka jaidbynriew. Wat lada ka la shim por 65 snem, u Bah John F Kharshiing, u la ong ba ki kam ki la nang iaid shakhmat hadien ba la ki Khlieh Nongsynshar jong ka jylla Meghalaya ki la leit ia kynduh ia ki bor ba ha khlieh duh jong ka Sorkar India, bad ba ka jingbuddien ka dang iai long haduh kine ki sngi. U la ong ba kane ka dulir ka ai bor ia ki khun ki hajar bad kam pat iap namar haduh kine ki sngi ngi dang long ki trai khyndew, u la ong ba ki dang don shuh shuh ki dulir kiba shyrkhei kiba u la nang lap kiba yn sa nang pynmih ha ki por kiba donkam.
Ha katei ka sngi la don ruh ka jingrwai Khasi bad Pnar na ka bynta ka Ri hapoh ka jingialam jong i kong Silby Passah, bad ka drama lyngkot na ka Seng Biria Dei Por, na Mairang, Hima Nongkhlaw shaphang ka Instrument of Accession bad ka Annexed Agreement kaba 15 December 1947.
Ha katei ka jingialang la ioh jingkren na ki rangbah jong ka Grand Council of Chiefs of Meghalaya, bad na ka Federation of Khasi States, kynthup ia ki Syiem, Lyngdoh, Sirdar, Dolloi, kynthup ia ki nongialam jong ki seng bhalang kynthup ia ka kynhun NESO, KSU, FKJGP, HNYF, SSSS, ki seng longkmie, bad ki riewrangbah, bad da kawei ka jingmut na baroh kiba ia shim bynta ha ki jingiakren ki pynsngew ia ka jingdonkam ba ka Sorkar Meghalaya bad khamtam ka Sorkar India ki dei ban pynpaw ia kitei ki dulir bad ki kyndon hapoh ka Constitution Ri India.
Shwa ban pynkut ia katei ka jingialang la ioh kyntien ai khublei na u Paiem KM Syiemlieh, Syiem Khynnah Hima Nongkhlaw.(SP News)
