Shillong Nailur 27: Kum shi bynta ban plie lad plie lynti ia ki khynnah skul ba kin pyni iala ka sap ka phong ha akban shna ia ki jingshna kiba har rukom, ki nongpyniaid jong ka Synod Higher Secondary School, kila pynlong ia ka Art and Science Exhibition ha ka sngi thohdieng.
Ha ka Art Exhibition ki khynnah skul naduh kiba rit haduh kiba la heh kila shna ia ki jingbuhkai, ki jingialehkai, ki jain bad kiwei kiwei bad ym tang ba la pyninam ia kine ki jingshna la ailad ruh ia ki kmie ki kpa ban thied lada I mon ia kino kino ki tiar bad kane ka pisa kaba la lum na kane ka Exhibition la noh synniang sha ka skul kum shi bynta jong ka jingrakhe ia ka jingdap 50 snem ne ka Golden Jubilee jong kane ka skul.
Ha ka Science Exhibition pat 5 tylli ki skul kila iashimbynta ha kaba kila pynkhreh kyrpang iala ki jingshna ryngkat bad ka ai jingbatai ia ki khynnah kiba jngoh ia kine ki jingshna.Ia ka nam lahduh ha kane ka exhibition la ioh da ka Synod Higher Secondary School, kiba la wan baar kadei ka Jaiaw Presbyterian School bad ka Christian Academy School katba kiba la wan balai ki kynthup ia ka KJP Higher Secondary School bad ka St Joseph Higher Secondary.
Ka Principal jong ka skul Synod ka kong D Shullai kala sam ia ki khusnam sha baroh kine ki nongjop ryngkat bad ka ai ia ka buskit.(SP News)
