Shillong, Jymmang 09: Pynlong jingiasyllok ka tnad Social Work, St Edmund’s College, bad ki nongaidawai kynbat, ki nongkhem, ki nongpynkha khun ki ba long ki dkhot jong ka Society for Promotion of Indigenous Knowledge and Practice (SPIKAP) ha ka 8 tarik May 2014, ha Shnong Khrang, Khatar Shnong, Hima Sohra.
Ha katei ka sngi la don ka jingia kren na i Bah R Langstieh, Kong E Kynta, kiba long ki nonghikai bad ki nongialam ia katei ka program na St Edmund’s College, Shillong, bad ka jingiasyllok na kitei ki khynnah College kiba la don kumba hynniewphew ngut, kan neh sa kumba ar sngi.
La ioh jingkren na u nongaidawai uba paw uba la ai dawai kynbat la palat sanphew snem u Bah Andrias, uba la ud ba ha kane ka snem mynta kawei na ki wah kiba paw ha katei ki thain Khatar Shnong kam shym don um shuh mynta ka snem namar ka jingtyrkhong ka mariang.
Ha ka jingkren u Dr PW Khongjee, Co-Chairman, MIDC, uba long uwei na ki trai Shnong, u la ong ba ka thain khatar Shnong ka dei ka thain kaba dap da ki dawai kynbat hynrei ka donkam kyrkieh ia ki bor Shnong, ki bor Sorkar ban shim khia ban thaw ki lad ban ioh ban pynroi ia ki jingthung kynbat ha kine ki thain. U la ong ba ki don ki soh bad ki thied kiba kordor bha ha ki thain khatar Shnong. Ha ka juh ka por u la ong ba donkam ka jingia burom mar kylliang bad ka jingiatrei lang kaba jan hapdeng ki doctor sla bad ki doctor sla tynrai
Haba kren kum u kongsan u Bah John F Kharshiing, Co-Chairman, MSPB, Chairman, Grand Council of Chiefs of Meghalaya, Chairman, SPIKAP, u la ai mynsiem ia ki dkhot SPIKAP baroh bad u la pyntip ba da ka jingbuddien ki bor KHADC ki la thaw ia ka Act bad ki Rule na ka bynta ban ithuh ia ki nongaidawai kynbat, bad u la ong ba hashen yn sa khot ia ka jingialang jong baroh ki dkhot jong ka SPIKAP ha Shillong ban ioh ban ia syllok ia kiba bun ki kam.
Ha katei ka jingialang la poi ki nongsumar na kylleng na ki thain Ri-Bhoi District, East Khasi Hills District bad na Jaintia Hills District, ki nongsumar da ki sla tynrai na ki Shnong bapher bapher kum na Umsning, Nongpoh, Bhoirymbong, Mawryngkneng, Rapleng, Pynursla, Saitbagon, Mawlap, Umniuh-tmar, Tynriang, Lum Wahnai, Pynter, Nongtynur, Nongsohphan, Lyngkrdem, Nongkwai, Mawpran, Laitdiengsai, Pyrda, Umsyiem, Mawlai, Diengsong, Nongtraw, WarWar, Mawtongreng, Khrang, Kshaid, Kongthong, Mawthawtieng, bad naduh Jowai.(SP News)
