Shillong, Lber 10: Kum shibynta kumnob an pynsngewthuh ia ki paidbah ha kaba ia dei bad ka jingai jingiada bad iarap ia ki briew lada ka don ka jingkhynniuh jumai ha kane ka nongbah Shillong kumba ka long ha u snem 1897 u ba jur haudh 8.7 yha ka jingthew ritcher kan long ka jingjulor kaba khraw ia kane ka nongbah Shillong bad ia ka thian baroh kawei.
Kane ka jinghikai ka long kumnob an iada bad ban iarap ia ki briew kiba ngat ha ka jingmynsaw la da ka don kano kano ka jingjia kaba sngewsih. Ia kane la pynlong da ka National Disaster Management Authority (NDMA), New Delhi da jingiatrei lang bad ka State Disaster Management Authority (SDMA) lem bad ka District Disaster Management Authority (DDMA), jong ka East Khasi Hills.
Ki jaka kiba la jied ban pynlong ia kane ka Mock Exercise mynta ka sngi ki kynthup ia ka Nongrimmaw Bhagyakul bad ki jaka sah briew ha ki bynta jong ka Laitumkhrah, MUDA Shopping Complex, ha Police Bazaar, Petrol Pump, Demseiniong, NEEPCO bad ha Shillong Public School.
Ha kane ka por ba pynlong ia kane ka jinghikai ka District Emergency Operation Centre (EOC) ka long kaba la khreh bad ka trei kam ha kaba ia dei bad ki jingjia kiba lah ban mih ha kane ka jingkhynniuh jumai bad kumno ban ai jingiada ia ki briew kiba mynsaw.
Kane ka jinghikai la pynlong katkum ki kyndon kiba la bthah da ka Incident Response System (IRS), ha kaba la pyni lyngba ki kynhun kiba la shah hikai janai ha kane ka kam bad kane ka jingpyni ka la iaid beit kumba la pynkhreh.
Ha dien katei ka jinghikai la air uh ia ka jingbatai hapoh Yojana Bhavan, Shillong ha kaba la don lang u J. K. Sinha, Member NDMA, Bah P. B. O. Warjri, Additional Chief Secretary, u P. K. Srivastava, Principal Secretary, bad ka kong L. Kharkongor, Commissioner and Secretary, Revenue bad Disaster Management, u Sanjay Goyal, Deputy Commissioner, bad u Shivajee Singh, Senior Consultant, NDRF (NDMA), bad kiwei kiwei ki heh kiba ia dei bad kane ka kam kila ia don lang.(SP News)
