Shillong Rymphang 24: Ia ka jingthep vote ha ka Umladang, kaba hap ha West Jaiñtia Hills District, la hap ban pynsangeh noh mardor hadien ba ki runar ki la pynjulor ia ka Electronic Voting Machine (EVM), ong u Bah Jopthiaw Lyngdoh, Commisioner & Secretary ka District Council Affairs
“Kine runar kiba rung hapoh Polling Station ki dei na kawei ka shnong. Ngi dang pyrshang ban wad jingtip ban dup ithuh durkhmat ia kito kiba donkti ha kane ka kam runar. Mynta ngi dang pynlong ia ka jingtohkit ban lap ia kito kiba donkti,” u la ong.
Na ka liang u Bah P. Dkhar, Returning Officer uba long ruh u Deputy Commisioner ka West Jaintia Hill u la pyntip ba yn hap ban pynlong biang ia ka jingthep vote hapoh kane ka Polling Station.
Ha kawei pat ka khubor, u Bah M. Marpna, Presiding Officer, u la shahkem noh ha ki pulit hadien ba la lap ba u la buaid khawyiang katba u dang don ha ka kam, ong u Sanjay Goyal, Returning Officer uba long ruh u Deputy Commissioner ka East Khasi Hills District.
Ngi la phah ia ki Magistrate sha katei ka Polling Station ban pynthikna ba jingthep vote kan ym don hapdeng ka jingthud. Ia une u ophisar la phah ban leh ia ka medical test. Ngin sa pynshitom ia u katkum ki kyndon aiñ, u la ong.
Palat phra lak ngut ki paidbah na rilum Khasi bad Jaintia kin jied ia ki nongmihkhmat sha ki ar tylli ki Autonomous District Council ha kaba 212 ngut ki kyrtong ki la mih ban aireng ha kane rynsan iakhun.(SP News)
