Shillong, Risaw 06: Ka Khun Hynñiewtrep National Awakening Movement (KHNAM) lyngba kane ka kyrwoh ka kwah ban pynpaw ia ka jingkmen hadien ka jingiohlad ban ioh ban pule bad ban iohi lyngba ki lad pathai khubor halor ka jingiatylli jong ki nongmihkhmat jong ki seng saiñpyrthei kum ka UDP, HSPDP, NPP, GNC bad ki nongmihkhmat shimet, ba kin ieng bad ban dawa na ka bynta ban ioh ban iakren halor ka mat kaba donkam bad kaba don ia ka jingdawa ha kum kane ka por – ka Inner Line Permit (ILP) bad halor ka shongsuk shongsaiñ.
Ka KHNAM ka ai khublei ruh ia kine ki nongmihkhmat kiba la shah jied na ki paidbah kum kita ki nongmihkhmat jong ka jaitbynriew riewlum na ka bynta jong ka jinglah jong ki ban iatylli ban kren na ka bynta ka jingeh jong ka Jylla kaba la shah tap lup da ka jingdum, jingkynriang bad jingpynjot na ka kti ki mynder bad kita ki riew shim kabu. Lada ha kum kane ka por ngim don ka jingtylli bad ka jingsngew kawei ka mynsiem ka por kam slem shuh ba ngin sa long ki mraw hapoh jongno re jongno.
Ka KHNAM ka don ka jingngeit ba lah ban ia pyrkhat ban ia pynkhih paralok hapdeng jong ngi lyngba ka jingiar jong ka jingiatylli ha kaba ngin lah ban ialeh bad ban iakhun na ka bynta ki mat jingdawa kiba bun kiba ka dei ka hok ba ki paidbah kidei ban iohpdiang. Da ka jingtylli jong ngi kan long ka nuksa sha kiwei pat.
Ka KHNAM ka buh ka jingkyrpad na ki nongmihkhmat kiba don ha ka liang pyrshah ba kin bteng ia ka jingdawa jong ki ban ioh ban iakren halor ka ILP kumjuh ruh haba iadei bad ka jingsniew dur ka shongsuk shongsaiñ ha Jylla.Dei ban kynmaw ba wei la kut jingmut ban pyndep ia kano ma ka kam ym dei ban kylla dien wat ha kano kano ka jingeh namar haba ka don ka jingsdang ngi dei ban don ka jingkut.
Haba iadei pat bad ka jingmynthi jong ki nongmih khmat ka Congress bad nongmih khmat shimet ki Khasi bad Garo, ka KHNAM kam don ka jingsngewpher namar kumba paw mynta kine hi ki dei tang kita ki shakri ym jong ki paidbah hynrei jong kata ka Meghalaya United Alliance (MUA) hapoh ka jingialam u Mukul Sangma kum u Myntri Rangbah kaba lah pat ban ong ba kidei tang ki mraw jong ka MUA..
La kyntu ia ki nongmihkhmat ba kim dei pyndem ialade bad dei ban bud ia ka nuksa jong u Myntri ka Sorkar kmie jong ka tnat Human Resource Development, Pallam Raju bad Myntri ka tnat Tourism, K. Chiranjeevi kiba don ia ka jingpyrkhat na ka bynta ka jaitbynriew jong ki ha kaba ki la ialeh pyrshah ia ka jingmynjur ka kynhun Myntri jong ka sorkar UPA ban phiah ia ka Jylla Andhra Pradesh ban thaw pat da ka Jylla Telangana.
Khatduh khatwai, ka KHNAM ka kyntu ruh ia ki paidbah ba kidei ban ai ka jingkyrshan kaba pura ia ki nongmihkhmat kiba don ha ka ingdorbar thawaiñ (liang pyrshah) kiba yn dang kren halor kitei ki mat bad ruh ia ki 10 tylli ki sengbhalang kiba dang iaineh ha ka jingiakhih jong ki ban dawa na ka Sorkar ban pyntreikam ia ka ILP hapoh ka Jylla.(SP News)
