Williamnagar, Jylliew 07: Ki pulit jong ka jylla Meghalaya ha dien ba ki la ioh ia ka jingtip ba ka don ka ktem jong ki GNLA ha Adogre ki la leit ban ker kut ia ka bad ha kane ka jingleit ki la lap ba ki lehnoh kiba sah ha kane ka jaka ki la dap het.
Na ki kot ki sla kiba la ioh ban kurup na kane ka ktem jong ka GNLA ka kdew ba kane ka ktem ka dei kaba la pyndon kam da u Commander In Chief u Sohan D Shira ha kaba u la ioh ban phet na kane ka jaka shuwa ban poi kipulit.
Na kane ka jaka la lap ia ki kot ki sla dawa pisa kiba la thoh da ka seng ULFA na ka jylla Assam bad kane ka la pynshisha ia ka jingiadei ka GNLA bad katei ka seng lehnoh na ka jylla Assam. Nalor kane la ioh kurup ruh bun ki kot ki sla kiba pyni ia ka jingia iathied tair siat.
Ha dien ba ki la wan phai ki pulit ki la shah ther kuli ha ki lehnoh kiba thmu ban wan sha kane ka jaka. Ka jingiasiat kala neh katto katne por. Na kane ka jaka ia siat ki pulit ki la ioh ban tam ar tylli ki pisatol, saw tylli ki carbine 7.65 bad kit air pynbethei bomIED bad ki Electronic Detonators.(SP News)
