Shillong, Lber 14:Ka Confederation of Ri Bhoi People (CORP) Eastern Zone lyngba u President, Bah Garland Kharsyntiew ka la pynrem jur ia u bah Defring Masharing na ka shnong Umpohwin uba la rahbor ia kawei ka khynnah samla na ka shnong Pyllun ha ka 6 tarik mynta u bnai ban pynhun ia ka jingkwah brai ka doh, uba la duh noh ia ka mynsiem iatip lem bad rah bor ia katei ka khynnah samla sha ki thain Byrnihat ban leh be-ijot.
Halor kane u bah Garland ula ong, ba ka seng ka pynrem jur ia katei ka jingleh utei u rangbah u bym don shuh ka mynsiem sngewsynei ia ki khynnah khunlung tang ban pynhun ia ka jingkwah brai ka doh.
Kumta, ka seng ka kyntu ia ki bor ba halor ka ain ban ai ka jingpynsajia kaba tyngeh ia utei u rangbah uba la leh ia katei ka kam pohjait khnang ba kiwei kiwei ruh kin ym mliem shuh ban leh ia kum katei ka kam pohjait poh rati.(SP News)
