Shillong Naiwieng 06: Ka Hynniew Trep Achick National Movement (H.A.N.M) Central Body hapoh ka jingialam u President u Bah Lamphang Kharbani, bad Bah Rejoice Nongsiej kum u Secretary kila pynpaw ia ka jingsngewkhia jur bad jingsngewlehrain kaba khraw haba ki iohi ia ka kaiphod jong ka C.BI. halor ka jingthung kam sop sop da ki nongmihkhmat kiba don ha ka bor bad ha ka shuki kaba ki bat da bun bun tylli ki Department ki iadonktilang ha kane ka kam be-ain ban thung nonghikai sop sop ia ka kam Assistant Teacher ha ki skul Sorkar Lower Primary School bad kane ka la pynlehrain haduh katta kaata ia ka jylla Meghalaya.
Katkum ka kyrwoh kane ka seng kala pynpaw ba kane ka pyni shai kdar ba kam don jingmut shuh ban buh ia ki IAS, ki Officers, ka MPSC bad D.S.C. ha kane ka jylla lada kitei ki MLA, MDC kim burom shuh ia ka ain bad shim noh halade ia ka bor thungkam thungjam.
Ka HANM ha ka jingiakynduh kyrkieh, kala pynpaw ia ka jingsngew bitar halor ka jingthungkam be-ain khlem ka lynti kaba dei, ka movement ka pynpaw ruh ka jingmih jong kine ki kam jaboh kaba ki nongialam jong ka jylla kila leh ha ka tnad Education khlem pep kan sa paw pyrthei sa ha kiwei pat ki department. Lada wad ia ki jingshisha baroh, namar ngi la dep iohi lypa ba bun bah ki samla kiba la nang la stad tangba kim don ka jingiadei kaba jan bad ki Minister ka long lehnohei ia kiba la pyndep ia ki jingpule, katba kiwei pat kiba shu pule tang malu mala hynrei ki don ka jingiadei kaba jan bad ki Politicians ka long kaba suk bha ban iohkam sorkar.
Shuh shuh ka HANM kam lah ruh ban pdiang ia ka jingpyrshang da rapjot u C.M ia ki MLA MDC kiba donkti ban thungkam sop sop bad ban leh ki kam beain. Ha ka jingshisha u Dr Mukul Sangma u Myntri Rangbah ka jylla, u long ruh kum u kpa jong ki MLA, bad ki MLA, MDC ki long kum ki khun jong u ha ka sorkar, u la dei ban sneng bad pynshistom ia ki khun, khnang ba ki khun kin ym mlien shuh nangne shakhmat. Hynrei lada u kpa u iada ia ki jingleh beain jong ki shano ka lawei jong ka jylla kan poi? Lada ki nongmihkhmat ki leh ia ki kam beain ka long ka jinglehrain kaba khraw ia ka jylla bad lada ki nongialam jong ngi ki leh ia ki kam babha ka long ka burom ia ki paidbah jong ka jylla Meghalaya.(SP News)
