Shillong, Naiwieng 03: Ka Dorbar Ki Khlieh Nongsynshar Ka Ri Hynniewtrep, ka kyrpad jur ia ki bor KHADC ba kin ailad shwa ban ioh ban ia pyrkhat sani bha halor ka ain ne ka bill kaba la tyrwa bad kaba ki 30 ngut ki MDC kin shim ia ka rai lashai ka sngi.
Ha ka jingshisha ki Hima Khasi ki la kyntu jur ia kibor KHADC ba kin pynsted shwa ia ki Ain ki rule na ka bynta baroh ki 54 Hima /Elaka. Haduh kine ki sngi ki bor KHADC na ki 54 Hima/Elaka la dep shna Act /Rule kumne harum – Na ki 25 Hima Khasi States – La dep 12 tylli ki Act bad tang 2 tylli ki Rule la dep shna kata ka long na ka bynta Hima Nongstoin bad Hima Maharam. Kine ki ar Hima Khasi States ki la don ruh ki Ain Shnong kiba bniah.
Katba na ki 29 Elaka Sirdarship – La dep 7 tylli ki Act bad ha kine baroh 29 Elaka Sirdarship ngim pat dep thaw ia ki Rule haduh kine ki sngi. Ki Ain Shnong ki pher na kawei ka Hima sha kawei ka Hima.
Kumta halor kitei kiba ki daw ngi kyrpad jur ia ka Executive Committee, KHADC ban pynsangeh noh shwa ia ka KHAD (Village Administration ) Bill 2013, kum shibynta ban ailad ia ki bor KHADC ba kin iarap ban thaw da ki Act/ Rule jong kawei pa kawei ka Hima /Elaka khnang ban pynneh pynsah bad ban nang pynjanai ia kaei kaba ngi la ioh na ki longshwa. Ngi tyrwa ba ngin ia pynmeh ia ki sharak ban ia shong miet bad ban pyndep ia kitei ki kam lyngba ka special session ban ai Khublei Christmas da ki Act ki Rule jong baroh ki 54 Hima/Elaka kiba dang sah ha u bnai ban wan ha shwa ka 25 tarik u December 2013.(SP News)
