Shillong, Jymmang 12: Ka Aroha Music and Cultural Society ha ka sngi saitjain ka la pyniap biej ia ki paidbah nongwan sngap da ki sur jingrwai kiba la tip kum ki Western classical music bad ha kajuh ka por ka la don ruh ka jingpule Poitri ia kaba la pynlong ha Loreto Convent Auditorium.
Ki jingrwai kiba kane ka kynhun ki la rwai ruh ia ki jingrwai ba la ai kyrteng `Let`s Call the Whole Thing Off` bad `Have You Met Miss Jones?` kiba la pynkyndeh mynsiem ia ki nongwan sngap.
Na ka bynta kito kiba ieid ia ki jingrwai kiba rim Classical kane ka kynhun ka la rwai ruh ia ki jingrwai ba la thaw da ki nongshna jingrwai kiba pawnam kum ki jong u Chopin, Handel bad Mozart, bad kaba kham pynshoh jingmut eh ka dei ka jingpule poitri kaba la nang pynsngew tynnat shuh shuh ia kane ka janmiet.
Kawei na ki jingrwai kaba kane ka kynhun ka la wanrah ha kane ka rynsan ka dei ka sur jingrwai `Anti-Litter Jingle.`
Ki sur jingrwai ha kane ka janmiet ki la long ruh na ka sur kaba syiang jong u Samla Toshan Nongbet uba la kiew rynsan ha ka India`s Got Talent bad kumjuh ruh na ka Serenity Choir, na i Venetia K. Wanshong bad Nanetta Massar kynthup ruh na u samla Emmanuel Martin Marbaniang bad u Ronojit Chaliha uba la pyni ia ka jingtbit ha ka tem piano bad Adiel Massar uba la tem ia ka Cello.
Ka jingpule poitri ka la long ha ka ktien Phareng bad Khasi kaba wanran na ki khynnah skul bad ki nonghikai kolej.
Ka Kong Pauline Warjri, kaba long ka nongpyniaid ka la ong ba kane ka janmiet kan long ruh ka rynsan ban plie sha ki riewdonsap ka nongbah Shillong ha ka rwai ka siaw, ka tem ka put bad ha ka thoh Poitri.(SP News)
