Shillong, Iaiong 26: Ka General Council jong ka seng HSPDP kaba juh long man u snem mynta ka sngi ka la pynkshem biang ia ka jingdawa la ka jong ka jylla ka Khasi –Jaintia State.
Ha kane ka jingialang kaba la long mynta ka sngi ha Jaiaw Lum Pyllon Indoor stadium ka la ai jingbit ia ka Central Executive Committee kaba thymmai ba kan wan rah ia ka jingpynkylla ia ki katto katne ki bynta jong ka Constitution jong ka party ban ia beh katkum ka jingkylla jong ka por khlem da ktah ia ka tynrai jong ka seng.
Ha kane ka sngi ka party ka la jied ruh ia ki nongkit kam kiba thymmai. Ha kane ka jingjied ia ki nongkit kam, da kawei ka sur ka General Council kala pynskhem biang ia u Bah Hopingstone Lyngdoh kum u president jong ka party, la jied ia u Bah Ardent Basaiawmoit kum u Vice President bad u Bah Enbin K Raswai kum u general secretary jong ka party lem bad shibun kiwei ki nongkit kam jong ka seng.
Haba kren ha kane ka jingialang na ka liang jong u Bah Hoping u la pynkynmaw ia ka nongrim ba ka seng ka ieng bad kata ka long ban iada ia la ka jong ka jaid bynriew. Na ka liang jong u president u la kyntu ia ki nongtrei jong ka seng ba kin trei shitom ban shna ia ki unit ha ki dong bad ki jaka bapher bapher jog ka Ri Khasi Jaintia.
Ha ka jingkren jong u Bah Ardent u la ong ba kum ki dkhot jong ka party dei ban ia trei shitom bad ban don ia ka mynsiem kum shipara, u la ong ban pynurlong ia ki jingdawa bad ki jingdon kam kum ka jaid bynriew ka long tang ynda ka party kala wan ha ka bor.
Kumba ka long mynta ki paidbah jong ka Ri Khasi bad Jaintia ki phai khmat sha ka seng HSPDP ban ialam ia ka jaidbynriew bad dei tang hi ka seng ka lah ban leh ia kata namar ka don la ka jong ka nongrim kaba skhem.(SP News)
