Jowai, Jylliew 11: Ka Jaintia students’ Union (JSU) sengkmie ka pynpaw iaka jingpyrshah kaba jur iaka Sorkar Jylla halor ka jingthmu ban pynkynriah kam ia u Deputy Commissioner jongka West Jaintia Hills District u ba bat iaka kam kum u khlieh duh jongka District dang tang da ki bnai mynta. Na ka liang ka JSU ka pynpaw ba Kane ka jingthu pynkynriah kam ia u DC WJHD ka dei ka jingibein iaka District baroh kawei namar une u DC ba mynta u dei shisha u briew uba trei hok, uba shimkhia bad trei shitom
iaka kam bad u dei ruh u briew uba sngewrit bad iarap kylluid ia baroh ki briew kiba donkam kat ba shah ei ka bor jongu kum u Deputy Commissioner.
Kum ka Union hapoh kine ki khyndiat bnai ka la ioh ban sakhi iaki rukom treikam jong une u DC ha kaba u la leh shisha shibun ki kam na ka bynta ka roi ka par jong ka District baroh kawei khamtam eh iaka
jingshong suk shongsain ki nongshongshnong jongngi ha ki thain khap pud.
Halor kane, naka bynta ka roi ka par bad ka jingmyntoi jongka District baroh kawei ka JSU ka pynpaw iaka jingpyrshah kaba jur halor kane ka jingthmu jongka sorkar ban pynkynriah kam ia une u DC uba
mynta u ba don dang tang da ki bnai hapoh kane ka District. Kumta la dawa naka sorkar ba ka dei ban pynsangeh noh shi syndon ia kane ka jingthmu pynkynriah kam ia une u DC khnang ba ka District kan nangkiew shaphrang. Kane ka long katkum ka jingpyllait khubor jong u president ka Union.(SP News)
