Shillong, Naitung 30: Ki nongialam jong ka seng KSU mynta ka sngi ka la leit ban ia kynduh ia u ia ki heh jong ka the Meghalaya Public Service Commission (MPSC) ban pynpaw ia ka jingsngew pyrshah ka jong ki ia kaei kaba ka sorkar ka la leh ban shah ia ki briew kiba dei ki nongshong shnong ka jylla Meghalaya kiba la wan na East Pakistan ia kaba la tip mynta kum ka Bangladesh.
Kumba ka paw na ka jingpynbna sorkar ba ka don ka kyndon ba ka sorkar Meghalaya ka la shah ia ki nongshong shnong jong ka jylla Meghalaya lane kiba thmu ban shong duh ha kane ka jylla kiba dei na East Pkasitan, mynta ka Bangladesh, ki lah ban apply na ka bynta ka kam Assistant Conservator of Forests kaba hap hapoh jong ka tnad khlaw.
Ha dien ka jingwan ia kynduh ia ki heh jong ka MPSC, u samla Auguster Jyrwa General Secretary jong ka seng u la ong ba ka seng kan pynsangeh ia kum kine namar kane kan ktah ia ki trai shong jong kane ka jylla Meghalaya.
Ha kane ka jingiakynduh na ka liang jong u Secretary jong ka MPSC u la ong ia ki nongialam jong ka seng KSU ba ka MPSC ka dei tang ka nongpynpeit ia kane ka kam kaba dei ka jong ka tnad khlaw, bad la ong ba yn sa pyntip ia kane sha ka tnad khlaw jong ka sorkar.
Ka advertisement no.: MPSC/ADVT-38/1/2012-2013/20, Dated Shillong kaba la pynmih ha ka , 1st July, 2013 ka ong ba kito ki briew kiba la wan na East Pakistan (mynta Bangladesh) kiba shong ha kane ka jylla lane kiba thmu ban shong neh ha kane ka jylla Meghalaya kiba don ia ka jingpynshisha ba ki dei ki nong India ki lah ban apply ia katei ka post.(SP News)
