Shillong, Kyllalyngkot 13: Ka Confederation of Ri-Bhoi People Eastern Zone (CORP-EZ) ka pyrshah jur iaka GRINFRA Project halor ka jingthoh jong ka haki Mile Stone daka Kyrteng BARAPANI ha ka jaka UMIAM.
Ka jingpyrshah jong ka Seng halor katei ka jingthoh ka long ba kam sngew iahap ban pynkylla iakino kino ki jingthoh ba pynsahnam ha kino kino ki jaka ba ladon lypa ka kyrteng khasi hynrei yn pynkylla pat sha ka kyrteng Nongwei, namar kum kitei ki jingpynkylla naka wei ka kyrteng sha ka wei pat ka kyrteng, khamtam naka ktien Trai sha ka ktien nongwei, ka pyni ba ki nongpynkylla kim burom iaka kyrteng haka ktien trai jong ki Trai jaka, bala buh bad jer lypa da u longshwa manshwa.
Haka juh ka por ka Seng ka sngew ba daka jingdon kino kino ki jingthoh haki surok ne ha kino kino ki jaka kan pynkynmaw ia U wei pa U wei U Nongleit nongwan ban tip bad ithuh iaka kyrteng bad ka ktien jong kano kano ka jaka, bad ngi hap ban burom iaka, namar kadei ka ktien tynrai lajong.
Kumta ka Seng ka Dawa ba ka GRINFRA Project ka dei ban pynkylla noh iaka tei ka jingthoh BARAPANI sha ka UMIAM kaba dei ka ktien ka Khasi.
