Jowai, Kyllalyngkot 19: Ki jingthungkam sop sop ka long ka ba jur bha ha JHADC katkum ba la ioh jingujor na kiba bun balang ki ba la wan sha ka JYF&JSU ban iathuh ba ki khun samla ki ba la passed bha ha ki jingpule bapher bapher jong ki kim donkam donjam naba ym don nongmihkhmat ki ban iarap ia ki ban
ioh rung kam ha kino kino ki department wat lada ki lah passed ia ki interview bapher bapher ruh kum ka DSC.
Ki ar seng hadien ba ki la ia kynduh lang ha office treikam ka JSU Sengkmie ki la shim ia ka rai ban dawa beit mardor na ka JHADC ban weng noh shisyndor ia ki briew kiba ka lah dep thung ban trei ha ki tnad bapher bapher jong ka khlem da khot Advertise ne interview, lyngba ki lad pathai khubor kiba long ka jingiarap ban ioh jingtip paitbah, khamtam eh ia ki samla wad kam kiba shu shong ing mynta hadien ba ki la pyndep ia ka jingpule jong ki,
Ka long ka ba shisha ba ngi la lap da la ki jong ki khmat ba ka JHADC ka la leh palat ha ka rukom thungkam ha ka ba ki nongtrei jong ka ruh ki ba la trei shwa kim ioh wat tang ka shuki ban shong namar ka jingthungkam ka la long palat ia ka bor jong ka JHADC, ioh lehse ka ne ka jingthungkam kan long pynban ka jingmyntoi ia no re ia no ki nongmihkhmat ha ka ne ka Election MDC 2014 ong u Emperor Bareh General Secretary ka JSU Sengkmie.
Dei na ka ta ka daw na ka liang jong ki Ar Seng ki dawa ba ka JHADC ka dei ban sangeh shisyndon na ka jingthungkam ioh kan ktah kylla ia ka pla tyngka jong ka JHADC namar ba la bunsien ngi lap ba ka JHADC ka kyrduh pisa na ka por sha ka por kumba la iohi ha ki lad pathai khubor ong u bah P.L Majaw President ka JYF Sengkmie.
Ki Ar Seng kin ym shong kli kti bad kan dang iai bteng ban wad lad kumno ban wanrah ia ka thungkam thungjam ka khuid kaba suba khlem da leh shilliang iano iano ruh ki samla wad kam, khnang ba ka JHADC kan lait na ka jingeh hadien habud ha ka ba ia dei bad ka thungkam
thungjam.
Te kumta na ka liang jong ki Ar Seng ki dawa ba ka JHADC ka dei ban burom ia ka sur jong u paitbah ban nym leh khlieh biej ha ka rukom thungkam thungjam, hynrei dei ban da pyntip paitbah khnang ba ka
jingthungkam ha JHADC kan long kaba khuid ba suba khlem da noh shilliang shano shano ruh lym kumta ki Ar Seng kin iaid shakhmat ban pynpaw pyrthei ia kino kino ki jingleh tam jong ka JHADC pynkut u
kyrwoh na ki ar Seng ka JYF bad ka JSU.(SP News)
