Shillong, Iaiong 26: Ka KSU Upper Shillong Circle bad ka FKJGP Upper Shillong Circle kiba long ki Seng kiba imsngi ban peitngor ia ka bha ka miat ha ka thain Upper Shillong kum juh ha ka Ri bad ka Jaitbynriew hi baroh kawei hadien ba ki la ioh ia ka jingtip ba ka don ka jingthmu bad ka jing pyrshang jong katto katne ki khwan myntoi shimet ha ka thain Upper Shillong kiba thmu ban lilam bad ban die duh ia ki katto katne tylli ki jaka kiba don ha ka thain sha ki Border Security (BSF) bad sha kiwei de ki tnat shipai.
Na ka liang jong ka KSU Upper Shillong Circle bad ka FKJGP Upper Shillong Circle ki la pynlong ia ka jingpeit pyrman mynta la katto katne por ha kaba na ka liang jong ki arseng ki la pyrshang ruh wat ban twad jingmut na ki paidbah ha kaba la sngewthuh ha kaba wat na ka liang jong ki paidbah ruh ki la don ka jingtip wur wur – wer wer halor kane ka bynta bad ki don ruh ki shnong ha kaba ki paidbah ki la lum jingialang hi la bun bun sien naduh kine ki khyndiat bnai bala dep ban iakren sani halor kane kane ka bynta bad pyrshang ruh ban pan jing pynshai na la ki jong ki Nongialam Shnong, phewse imat kalah ban don kaei re kaei kaba sha lyndet ha kaba ki Noingialam shnong ruh ki ialeh ban burieh ia kane ka kam da kaba ong ba kim pat don jingtip ei ei halor kane ka bynta.
Na ka liang jong Ka KSU Upper Shillong Circle bad ka FKJGP Upper Shillong Circle kum ki Seng kiba don shisha ka jingkitkhlieh ka shim ia kane ka sienjam kum ka jing maham jur ia baroh kiba iadon bynta ha katei ka kam khamtam eh ia kita ki Agent/Dalal die jaka kiba pyrshang ban tap eitmiaw da kaba pyrshang wat ban leh Benami ia ki jaka ki puta da kaba pyrshang ban thied ha ka kyrteng jong ki riew shimet bad nym pynpaw pyrthei satia ia ka jingthied jaka jong ki BSF bad Shipai, na ka liang jong ki arseng ki la ioh jingtip ruh ba ki don napdeng kita ki Agent/Dalal kiba la dep shim lypa ruh wat ia ka Advance na ki BSF.
Kineki ar tylli ki seng ki la kren shai ba kim don satia ka jing pyrshah ia kaka kam kamai jakpoh jongno jongno hynrei Ngin ym ailad pat ba kata ka Lad kamai jakpoh jong kita ki Agent/Dalal die jaka kan ktah pat ia ka shong suk shong shngain bad ka jingduh noh iala ka jong ka khyndew ka shyiap khamtam eh ha ki bor shipai namar kum ka jaitbynriew ngi la dep mad bad iohi ia ka jing shah pyndik jong ki paidbah ha kitei ki bor shipai la ka long ha 101 Area, Air force kiba don ha ki Thain Upper Shillong kiba la pyrshang ban khanglad wat ia ka surok ha ka thain Lum Shyllong.
Nalor kitei ki jaka kiba la shah ktah ki paidbah ka long kum ka thain Madanryting, Happy valley, Mawshabuit bad kumta ter ter… kumta Horkit Hordang na ka liang jong ka KSU Upper Shillong Circle bad ka FKJGP Upper Shillong Circle kin nym ailad da lei lei ruh ba ki Piadbah jong ka thain kin dang iaimad ia kitei ki juh ki jingeh”.(SP News)
