Nongpoh, Rymphang 15:Ka RBYDSO Central body kaba long kawei na ki seng bhalang kaba pawkhmat ka them Ri Bhoi lyngba u President, u Samla Dibishon Malai ka la pynpaw ia ka jingpyrshah jur halor ka jingthmu ka sorkar ban wanrah ia ka lynti rel (railway) ha ka ri lum Khasi-Jaintia lyngba ka Ri Bhoi District.
Ka seng kan ym lah ban pdiang ia mynta hi ia katei ka jingthmu ka sorkar ban wanrah ia ka lynti rel khlem da biang ki lad jingiada kyrpang ia ka jaidbynriew rit paid ha kane ka jylla.
Ka seng ka pynpaw ia ka jingpyrshah halor ka nongrim ba ka sheptieng ioh ba lyngba katei ka lynti rel kan long pynban ka lynti bah ban plie lad ia ki bar jylla bad ki mynder ri ban ioh rung suk ha kane ka jylla bad ki ban iuh ia ka hok jong ki trai ri trai muluk ha baroh ki liang.
Dangshen la iohi ha ki lad pathai khubor ba u MP ka Shillong Parliamentary u Ma Vincent H Pala ula pynpaw paidbah ha kawei ka jingialang ialap elekshon, ba ka sorkar India ka la mang kyrpang T.8700 klur ban wanrah ia ka lynti rel ha Ri lum Khasi Jaintia lyngba ka Ri Bhoi District.
Ula kam ruh ba lyngba kane ka lynti rel kan wanrah ia ka jingmyntoi bad ka jingkylla ia ka Jylla hynrei une u MP badon burom haduh katno ula pyntip bad pynshai sha ki paidbah, kiba kum kiei ki jingmyntoi ba ki trai ri trai muluk kin ioh na katei ka jingpyniasoh ia ka lynti rel sha kane ka jylla ne kan long pynban tang ka lad ban pynsuk ban wan khaii pateng ia ki heh saipan bar jylla ban knieh ia ka hok long trai jong ki briew jong ngi.
Ka seng ka la ioh jingtip ba ka sorkar ka la angnud la slem ban wanrah ia katei ka lynti rel ha Ri Bhoi Disitrict bad ban pynurlong ia kane ka jingthmu ka la dep ban surbe ia ki katto katne ki jaka ha ki bynta ka Byrnihat, hynrei ka long kaba sngewlyngngoh haduh mynta ym pat don kano kano ka jingpynshai sha ki paidbah ia ki lad jingmyntoi kiba ki trai ri kin ioh bad ki lad jingiada ia ka jingwan rung kyrthep ki mynder ri ha kane ka Jylla, hato ka sorkar jylla ka la don ne em ka jingiateh kular ban pynrung kam kyrpang ha katei ka tnad railway ia ki samla na kane ka jylla.
Kumta, kat kum ka jingiohi bad ka jingsngew jong ka seng ia mynta hi ym lah ban pdiang ban wanrah ia katei ka lynti rel ha Ri Bhoi lada ym pat biang ki kyndon ban iada bad lad jingmyntoi ba paka sha ki trai ri bad ia katei ka pisa ba la mang da ka sorkar kmie ka la bha ba u MP un thep shwa sha ka pla la jong bad sa ei ynda la lah ban pynurlong ia kitei ki lad jingiada ba donkam na bynta ka bha ka miat bad ka shongsuk shongsngain bad ka jingmyntoi ia ki briew jong ngi.
Lada ka sorkar kan wanrah ia katei ka lynti rel kat kum ka jingkwah jong ki paidbah ha ryngkat ki lad jingiada kiba biang ka seng kam don kano kano ka jingpyrshah bad ka kloi ban iatrei lang na bynta ka jingmyntoi lang ki paidbah. Ha kajuh ka seng ka sngewdei ban ai jingmut ia ka sorkar ban wanrah tang ia ka rel kit marbam mardih ym ki rel kiba kit briew kata ruh tang ha Byrnihat. (SPNews Agency)
