Shillong, Jylliew 11: Ki 20 tylli ki shnong na ka thain Mawdiangdaing sha duh Diengphatsoh ryngkat bad ki seng bhalang mynta ka sngi ki la pynlong ia ka jingialang paidbah ha Diengphatsoh ban pyrshah ia ka jingthmu jong ka sorkar ban thied ja ka na ka bynta ban shna ia ka New Shillong Township (NST).
Wat la ka sorkar ka la dep shim ia ka rai ban thied ia kitei ki jaka kiba don ha katei ka thain na ka liang jong ki trai shnong jong ki 20 tylli ki shnong ki la ieng skhem ban pyrshah ia kane ka jingthmu jong ka sorkar ka daw ka long ba bun na ki jaka ki dei ki jaka rep kaba ki im ja.
Ha kane ka jingialang paidbah kaba la long mynta ka sngi la shim ia ka rai ba ka sorkar ka dei ban ai da ka jingthoh hapoh ar taiew ban pynthikna ba kan nym thied shuh ia katei ka thain na ka bynta ban shna ia ka New Shillong.
Ha kane ka jingialang paidbah la kynnoh ia ka sorkar ba ha ka kyrteng jong ka rai ka par ka sorkar ka kwah ban thied ia katei ka jaka ha kaba ki kum ki nongshong shnong kin nym ailad da lei lei.
Ka kong Angela Rangnad ka la ong ba lada ka sorkar ka sngew ba kan wanrah ia ka rai kapar da kaba thied ia ki jaka ka long kaba bakla, ban ioh ia ki kam pynroi ka dei ka hok jong ki paidbah ba ki dei ban ioh ha ki shnong ki thaw. Lada ka sorkar ka sngewkhai ia ka roi ka par ka dei ban kyntiew ia ka rep ka riang.
Ha ka jingkren jong u Bah W Nongdkhar u la ong ba ka dei ka hok jong ki trai shimet aiu kinleh ha kaba ia dei bad ka jaka jong ki, u la ong ba ka Raid hi baroh kawei kan nym shah jem hynrei kan ia leh ia kane ka jingthmu jong ka sorkar na ka bynta ki pateng ban wan
Ha ka jingkren jongu bah Joe Marwein President jong ka FKJGP u la ong ba lada la shim da ka sorkar ia kine ki jaka kan sa aiti sha ki company heh spah ha kaba kin sa wan ban wanrah ia ki briew kiba na bar. Ha kane ka jingialang la don lang ruh ka kong Agens Khar shiing bad ki nongialam ka KSU lem bad ki rangbah shnong jong ki shnong na katei ka thain.(SP News)
