Shillong, Kyllalyngkot 22: Ka Jirang Block Congress Committee ka leit ban ia kynduh ia u President ka MPCC Dr. D.D. Lapang, ryngkat kumba 300 ngut ki nongtrei ba hakhmat eh bad baradbah jong ka Party Congress na Jirang Constituency na ka bynta ban dawa ia ka Ticket na ka Party Congress ba kan ai ha u Samla Albertus Lapang uba la ioh ia ka jingkyrshan jong ka Jirang Block Congress ha ka jingialang jong ka Candidate Selection & Scrutiny Committee ka party Congress.
Ka Jirang Block Congress Committee (JBCC) ka ioh jingtip ba ia ka Ticket la mut ban ai jubor da kiba na khlieh duh jong ka Party khlem da iaid katkum ki kyndon trei kam jong ka Party ha kaba kila pynrung jubor ia u wei u riew rangbah uba dei u briew jong u MLA- Independent, U Victor Rani, sha ka party Congress bad mut ban thom bor ia ka kyndon trei kam jong ka party da kaba iaid lait ia ka Ophis Order jong ka MPCC kaba No. MPCC/2FC/61/14 dt. 6th January, 2014 da kaba thmu ban ai Ticket ia u, u bym dei u briew jong ka Congress bad ruh khlem kano kano ka jingiasngewthuh jingmut lang bad ka Block Congress.
Kane ka jingleh ka la pynsngewsih kthang ia ka Jirang Block Congress Committee naduh ki nongkitkam jong ka Block baroh kawei, kiba kynthup lang ruh ia ka Mahila Block Congress bad ka Youth Congress bad baroh ki party Workers jong ka Jirang Block Congress. Ha katei ka committee ka Committee ka la rai ban ai jingkyrshan Candidate ia u tei u samla na ka bynta ka MDC Election ka ban long ha ka 24 tarik February 2014 bad ban dawa ban ioh ia ka Ticket naka Jirang Block Congress ia kaba la Recommend katkum ki kyndon riti treikam jong ka Party Congress.
Ka Block hi baroh kawei hadien ba la rai bad recommend ia u Albertus Lapang uba dei u samla uba ka party Congress ka iohi ba u lah ban wanrah shibun ka roi ka par. Hynrei phewse, Lada kiba halor nakhlieh duh ki mut ban pynrung ia uta u briew uba dei ruh u Candidate Victor Rani(Secretary ka NESPDP) na jingkhang iit khlem ki kot ki sla kiba biang ia kaba ka Block bad ka DCC ki la kyntait mardor ia ka Application ka jong u khlem da khein snep ne burom bad iaid khlem ka Procedure ne ki kyndon treikam jong ka Party, ngi ka Jirang Block Congress Committee, ngin iaid ruh khlem ki procedure jong ka Party.
Lada ki nongshna ia ka Constitution ki iaid lait, “te mangi hi lei ki rishot bad nongtrei jong ka party ngin leh kumno ? Ki dkhot jong ka Jirang Block kiba lah tip lypa iaka jingthmu ba rieh jong ka jingwan rung jubor jong une u Rangbah sha ka party Congress bad kata kadei ba u MLA Independent jongka Jirang, U Bah Lambok Mylliemngap u don jingthmu ban rung khlieh haka Congress bad ban pynjot pynpra de ia ka Jirang Block Copngress kaba rim” la kynnoh.
Khnang ba maki kin ioh ban thaw thymmai, ban shynshar donbor bad thombor kumba ka lah long mynta ha manla ki Dept. bad C&RD, Block bad iaka ioh ka kot ne ka roi ka par jong ki paitbah Jirang khamtam ki bym shem la kyrshan ia une u MLA haka Election ba dang shu dep shen. Kumta ka Jirang Block Congress sa shisien biang kala kyrpad jur iaki bor bahalor bad baha khlieh kiba donbor ban peit bad bishar bha halor kane ka phang bad ban mynjur ne sngap iaka jingdawa bad jingkyrpad, hynrei lada ki bor bahalor kim don jingsngew naka bynta ka jingbha jongki briew ka party bad ki paidbah, ka Jirang Block Congress kam banse ban pyrshah jur ia kane ka jingleh kiba ha khliehduh ki ba bat ia ka bor bad kiba iaid lait ia ki kyndon jong ka Party, te mangi ruh ngim banse ban iakhih ban ioh ia ka hok katkum ki kyndon trei kam jong ka Party Congress wat lada ka hap iangi ban khanglad(boycut) da kino kino ki lad ki lynti katba shah leit shaduh ki bor ba hakhlieh tam ruh ne sha ka AICC ne sha ki bor ka ain ban ioh iaka jingbishar kaba hok katkum ki kyndon.(SP News)
Haba don ka pisa lah ban pynkhein lut ki ain ki kyndon.