Shillong, Iaiong 17: Ka jingiasyllok kaba la long mynta ka sngi 17 April 2013, hapoh Khasi National Dorbar, Mawkhar, Shillong hapdeng ki Khlieh Nongsynshar bad ki seng bhalang bapher bapher ka la shim ia kawei ka rai ban ia kynduh biang hadien ka 22 tarik April 2013, hadien ba la dep long jingialang ka Sub-Committee, KHADC, kaba dei peit ia ka jingpynbeit thymmai ia ka Sixth Schedule.
Ha katei ka jingialang la mih bun ki jingiatai ki jingai jingmut halor katei ka jingthmu ban pynbeit thymmai ia ka Sixth Schedule.
Baroh ki la pynpaw ia ka jingsngew pyrshah ban wanrah ia kum kitei ki jingpynkylla kiba lah ban ktah ia ka jong long kaba kyrpang jong ka jaidbynriew.
Ka la mih ruh ka jingiakren halor Instrument of Accession and Annexed Agreement, 17 August 1948, ha kaba na ka liang jong u Bah John F Kharshiing, Chairman, Ka Dorbar Ki Khlieh Nongsynshar Ka Ri Hynniewtrep, u la pynpaw, ba ka hok ba shisha jong ka jaidbynriew ka dei ban don ha ka kyrdan jong Article kaba mut ka don ka hok ban ioh ka kyrdan Khasi State hapoh ka Fist Schedule jong ka Constitution ka Ri India katkum kitei ki jingiateh bad ki jingkular.
U la ong ba kane ka phang kan sa wan dur ynda ka jingshemphang jong ka jaidbynriew bad khamtam jong ki nongmihkhmat MLA bad MDC ka la ih ban tur ia katei ka thong kumba la pruid dak da ki longshwa.
Shuh shuh u la pynpaw ia ka jingsngewdiaw ia ka jingduna ki Act bad ki Rule kiba batai ka ki iktiar, kyrdan bad bor synshar jong ki jingsynshar tynrai. Kum ka nuksa la pyni kumno ba ka Indian Registration Act 1908 kam ithuh ia ki 16 jait khyndew kiba don ha kane ka Ri Khasi Jaintia jong ngi. U la pynpaw haduh katno ka jingsahteng kine ki kam kat haduh ba wat hadien 68 snem ka jinglaitluid ka Ri India hangne ha Ri Khasi dang ia leh mukotduma ban wad ia ka Riti bat khyndew bad ban wad ia ki trai jaka (kum ha shilynter ka Polo, ha Lawsohtun, ha Pomlakrai-Airforce bad kiwei kiwei ki jaka kiba dang don ha ka jingsah umdum) namar bym shai ki Ain hapdeng ka Sorkar India bad ki jingsynshar tynrai naduh ki Dorbar kur kiba bat ia ka bri kur.
Na ka liang ki sengbhalang baroh kiba la poi ki la pynpaw ba ki la dep shim ia ka rai ba kim pdiang ia katei ka jingpynbeit thymmai bad kin iai ap ban peit khmih kaei kaba ki bor District Council bad bor Sorkar Jylla kin leh halor ka jingpynsngew bad jingujor ka jong ki.
Katei ka jingialang ka la shim ia ka rai ba baroh ki kynhun trei kam mon sngewbha kynthup ruh ia ki Syiem, Dolloi, Lyngdoh, Sirdar, Wahadar, ki Dorbar Dur, Dorbar Shnong, Dorbar Raid, Dorbar Hima kin shim ia ka jingkitkhlieh ban khmih ba kan nym don ka jingpynsynjor ia ki jingiada hynrei ban nang tei bad ban nangpynkhlain ia ki jingsynshar kiba don.
Kiba la ia poi bad ia kren ha katei ka sngi ki long ki nongialam ki riewkhmat rangbah, longkmie bad samla, na ka seng kmie KSU, FKJGP, HNYF, KWADA, SSSS, KSU –NEHU, JSU, Convenor SOMALA, YDO, Nongwar, TUR, Rangbah Shnong Mawkhar, Sirdar Hima Mawdon, Joint Secretary Hima Nongspung bad kiwei kiwei.(SP News)
