Shillong, Nohprah 19: Ki khatkhyndai tylli ki seng bhalang na kylleng jong ka Ri Khasi Jaintia mynta ka sngi ki la pynlong ia ka jingialang paidbah ha Motphran ban pynpaw pyrshah ia ka ain bamsap kaba la wanrah da ka sorkar ha kane ka dorbar tlang kaba dang shu dep ia kaba la tip kum ka Lokayukta Act.
Ha ka jingkren jong u President jong ka AJYWO M.H Dkhar ha ka jingkren ka jong u la ong ba kane ka ain kam shym la kren ia ka bor jong u kliehduh jong ka ne ka ain ka sorkar ka sngapjar ha kane ka bynta. La ong ba kane ka ain ka long kum ka RTI ia kaba ym lah ban tian bishar.
Ha ka jingkren jong u president jong ka KSu u Bah Daniel Khryriem u la ong ba kane ka ain ka Lokayukta ka dei ka bym don bor haei haei ruh bad u la ong ba lada ka sorkar kam sngap ia ka sur jong ki paidbah wat pynbor ia ki lada ki shim da ki lad jingiakhih.
Ha ka jingkren jong u Bah Michel Syiem president jong ka MSM u la ong ba ki paidbah ki kwah ia ka ain kaba khlian ban iada na ka jingbamsap kumba long lem ha kiwei ki jylla, hynrei kumba ka long mynta kane ka sorkar kam kwah ban leh ia kane ka jingdawa jong ki paidbah.
Ha kane ka sngi ki la don bun ki nongialam na ki seng bapher bapher kiba la kren ha kane ka sngi bad ki la pynpaw ba kane ka jingpynlong ia kane ka jingialang paidbah ka long ban pynsngewthuh ia ka jingdon kam ia kane ka ain ban iada na ki kam bamsap ha kane ka jylla.(SP News)
