Shillong, Rymphang 26: Ka Kynhun na ka Jylla kaba la leit ban iashimbynta ha ka Assam Youth Festival for North East 2013 kala wanphai sha ka Jylla ha ryngkat ka Khusnam kaba la ioh rah ia ka nam lahduh ha ka Best Food Stall Award, Ki Nongiashim bynta ha katei ka Food Stall ki kynthup ia Lai Ngut ki Riew Rangbah kynthup ia u Bah Wenstar Kharkamni, Bah Teibor Majaw & Bah Augustine Shadap kiba dei na ka Ri-Bhoi District, ha kaba ki la shet ia ki Jingbam Khasi Tynrai ban pyni nam ia ka Rukom shet bad ka Rukom bam jong ki Khasi haduh ba ka la pynjawdud ia baroh kiba la wan sha kane ka Assam Youth Festival for North East 2013, kat haduh ba ka la pynlong ia ki Nongbishar (Judges) bad kumjuh ruh ia ki Officers kiba la wan ban sakhi ia katei ka Festival ban ai ka jingiaroh ha ki liang baroh naduh ka liang jong ka Jingkhuid jingsuba, ka rukom shet bad ka jingmad (Taste) ia ki jait jingbam tynrai kiba pher bapher ba la shet katkum kane ka juk kaba mynta. Ia katei ka Khusnam la sam da u Rockybul Hussain u Myntri ba dei khmih ia ka tnad Forest Department, Govt. of Assam bad la aiti ia katei ka Khusnam ha u Bah Bobby Wahlang Escorting Officer jong ka Jylla Meghalaya ha ka sngi bala pynhap pyrda noh ia katei ka Assam Youth Festival for North East 2013. Na ka liang jong ki Escorting Officers kiba kynthup ia u Bah Bobby Wahlang, Bah K.R.Nongbri bad na ka liang jong ki khun samla jong ka jylla kiba la leit ban iashim bynta ha katei ka Assam Youth Festival for North East 2013 ki la pynpaw ia ka jing sngewnguh kaba khraw ia ia Bah F.N.Dopth, Director Sports & Youth Affairs, Govt. of Meghalaya bad ia ka Department hi baroh kawei kaba la Plie ki lad ki lynti na ka bynta ki khun samla jong ka jylla ban leit ishimbynta ha kiba kum kitei ki Youth Festival.(SP News)
