Shillong, Nohprah 16: Ka Mission Sports Club ka la rah ia ka nam lahduh hadien ba ka la pynliem noh ia ka Pyndengumiong Sports Club ha ka tie breaker (6-5) ha ka VI Mairnag Civil Sub-Division Football Championship 2013 hynne ka sngi Thongdieng ha KSA Stadium, Mairang.
Ka jingialehkai ka long kaba itynnad bad iakhaid, kaba la pynhun ia ki paidbah nongpeitkam kiba la wan ban sakhi ia kane ka jingiakhun phainal kaba long shibynta na ka ka jingleh tamasa tlang ba la pynlong da ka FOCUS ha KSA Stadium, Mairang.
Ha ka jingiakhun ka Mission ka la ioh ban pynkhih jar nyngkong ha ka kylla miet, ka Pyndengumiong ka la khyllie noh shiminit shwa ban kut ban pyniakhaid da 1-1 kol.
Na ka liang ki nongpyniaid ki la rah noh sha ka tie breaker ha kaba ka Mssion ka la jop da (6-5) ia ka Pyndengumiong SC
Ha kane ka sngi, u MLA ka thain Bah Metbah Lyngdoh ula wan ban pynshngain ia ki rangialehkai kum u kongsan ryngkat ka jingdonlang u Pa’iem PM Syiemlieh, Syiem Hima Nongkhlaw kum u Symbud Kongsan kiba la sam ia ki khusnam sha ki kynhun ba jop bad ba rem.
Ka Mission ka khur ia ka song pisa kaba T.30 hajar lem bad ka throphy katba ka Pyndengumiong kaba wan baar ka khur ia ka song pisa kaba T.10 hajar lem bad ka trophy.
U Bah Pyndap Nongsiej, General Secretary ka Forum for Change & Uplifement of Society (FOCUS) ula iathuh ia katei ka tournament la pynlong la 2 bnai ha ki san tylli ki Zone ka thain Mairang, kaba long shibynta ban plie lad ia ki khynnah samla ka thain, na ki Zone ki jied ia ki kynhun ba khlain ban iakhun na bynta ban iaknieh ia ka nam lahduh.
Ha ka rongbiria iakop siat khnam, u bah Phrangshur ula jop bad khur ia ka song pisa ba T,3 hajar ryngkat ka sarnad, u Piat uba wan baar ula ioh rah T.2 hajar katba Thyllie u la wan balai bad rah ei T.1 hajar.
Kaba itynnad shuh shuh ka long ha kane ka tamasa tlang ka don ruh ka ialehkai iadur masi.(SP News)
