Shillong, Kyllalyngkot 31: Ki suba lehnoh ka kynhun kieng atiar jong ka Garo National Liberation Army (GNLA) ki la rahbor ia u Naga M Sangma, 39 snem ka rta uba long u para trai jong u Samuel M. Sangma, MLA ka Baghmara.
Katkum ka tyllong khubor ba la iohlum, la iathuh ba saw ngut ki suba lehnoh GNLA ki la leit rung ha ing sah jong u Naga M. Sangma ha ka por 7:30 baje janmiet jong ka sngi palei kaba don ha Gasaupara bad rahbor ia u na kane ka jaka.
Tad haduh ba la thoh ia kane ka khubor, ki bahaing jong u Naga, kim pat shym la ioh ia kano kano ka jingshah dawa pisa ban pyllait noh ia u Naga.
U Naga u dei u nongkhaii dewiong sha ri Bangladesh na Gasuapara Land Custom Station, kaba jngai 400 kilomitar na Shillong.
Haba pyrshang ban wad jingtip na u Samuel M. Sangma, u la ong, “haduh mynta ngam tip satia halor kaei ka daw ba u la shah rahbor. Ngam pat ioh jingtip wat haduh mynta la kane ka kynhun lehnoh ka la phah shithi dawa pisa neem sha u. Mynta nga don ha lynti ban leit sha Gasuapara ban iakynduh ia ki bahaing ban iakren halor kane.”
Kum ban shu kdew hangne ba ka GNLA dangshen ka la sam ia ki shithi ban dawa pisa T.5 lak haduh T.1 klur na ki trai Petrol Pump, ki nongkhaii dewiong bad ki hehspah nongkhaii kiba shong basah ha rilum Garo. (SP News)
