Shillong, Naiaiwieng 28: U myntri rangbah ka jylla u Dr Mukul Sangma haba kren ha ki nongthoh khubor ha dien ba la wai ka jingialang jong ka Cabinet u la ong ba ka sorkar ka la shim ia ka rai ban pynkiew noh ia ka jingiai jingiarap ia ki skul ad-hoc na ka 6000 hajar sha ka 12,000 hajar ha ka shibnai haki skul kiba don tang ar ngut ki nonghikai kane ka pyni ba ki nonghikai mynta kin ioh noh ia ka tulop kaba 6000 shibnai.
Kane ka jingpynkiew ia ka jingai jingiarap ia ki skul kiba dang dei ha ka ad-hoc kan trei kam naduh ka 1st Nailur 2012. Kane ka rai ka la wan ha dien ba ki nonghikai ki la dawa ba ki dei ban iohlem ia ka tulop kaba kham heh namar ki trei ia ka juh ka kam.
Na ka liang jong u myntri ba dei peit ia ka tnad pule puthi ka jylla u la ong ba ia kane ka rai jong ka kabinet yn sa phah noh sha ka department ban leh iaka kaba don kam namar ka jingdawa jong ki nonghikai ka long kaba dei hok.(SP News)
