Shillong, Nohprah 01: Ka joint committee hapdeng ki nongialam jong ka Federation of Khasi Jaintia & Garo People (FKJGP) Upper Shillong Circle bad ka Khasi Student Union (KSU) Upper Shillong Circle kaba la ia shong pyrkhat kam kyrkieh mynta ka sngi i.e. 1st December 2013 ka la iakren sani bha halor ki kam mynder (Infux) kiba ktah ia ka thain hi baroh kawei bad khamtam eh ia ka jingpyrshang jong ki bor shipai (Arms forces) kiba dang iai pyrshang haduh kine ki sngi kiba mynta ban iohlad ban thied duh ia ki katto katne tylli ki jaka kiba hapoh jong ka thain Upper Shillong lyngba ki lad bad ki lynti kiba pher bapher ban ioh long trai halor ka khyndew ka shyiap. Ki ar seng (FKJGP Upper Shillong Circle & KSU Upper Shillong Circle) ki la shim ia ka rai ban ieng rangbah haduh kaba kut bad ban nym ailad da lei lei ruh ba kata ka jing pyrshang jong ki bor shipai kan urlong kumba la phonsniew da mano re mano.
Kum ban shu pynkynmaw hangne ba na ka liang jong ka FKJGP Upper Shillong Circle & KSU Upper Shillong Circle dang ha kine ki khyndiat bnai ba la dep ruh ki la dep kren shai kdar ba horkit hordang kin nym ailad bad kin iai pyrshah beit lada ka dei makna ia ki Dorbar Shnong lane ki riew shimet ruh kiba thmu ban die ia ki jaka sha kino kino ki bor shipai (Arms Forces) kumta ha kane ka kynti kaba mynta ruh na ka liang jong ka FKJGP Upper Shillong Circle & KSU Upper Shillong Circle ki ieng skhem beit halor kajuh ka nongrim.
Ki ar seng hadien ba la ioh ia ka khubor ba katei ka jingthmu ban thied ia ki jaka da ki bor shipai (Arms Forces) ka dang iai bteng, na ka liang jong ka FKJGP Upper Shillong Circle & KSU Upper Shillong Circle kumba kila shimkhia naduh kaba sdang ban buddien kumta ha kane ka kynti kaba mynta ruh ki ar seng ki kyntu bad maham ruh ha kajuh ka por ia baroh ki riew shimet bad khamtam eh ia ki Dorbar shnong ba kin long kiba husiar ban ym bieit ia ka tyngka pliah ioh ka kyrtoh kylla. Katba ka jaitbynriew ka dang lynga bad pisa ia ka jing kuman jong ka sorkar ban pyn treikam ia ka Inner Line Permit bad ban ieng pyrshah ia ka ain iakjakor ‘Meghalaya Regulation of Landlords and Verification of Tenants Bill, 2013’ ha ka jing shisha ngi la dei ban kyndit thiah noh khnang ban lait na ka jing shah tyllep bad duh noh ia ka jing long trai halor jong ka khyndew ka shyiap.
Kumta na ka liang jong ki ar seng ha kane ka kynti kaba mynta ruh da ka mynsiem kaba sngewkhia bad da ka mynsiem kaba sngew kitkhlieh ka kyntu ia baroh ki paidbah jong ka thain upper shillong bad khamtam eh ia baroh ki Dorbar Shnong ba kin ai ka jing ia treilang khnang ban lah ban weng ia ki sohkyrdot kiba thmu ban teh ban khum ia ka jaitbynriew hi baroh kawei.(SP News)
