Shillong, Naitung 16: Ka Umtrew River Protection Committee (URPC) kaba dei ka synjuk jong ki Rangbah shnong bad Secretary kala rai ba shen kan sa leit ban khang tala noh ia ka company ri syiar kaba la tip kyrteng kum Meghalaya Agrovet Private Ltd (MAPLtd) kaba don ha shnong Mawthei kaba hap hapoh jong ka Ri Bhoi District.
Ia kane ka rai la shim hynne ka sngi ha ka jingialang kaba la long ha shnong Nongjri ha kaba ki Rangbah shnong jong ka thain Umsning bad kumjuh ruh na ka thain Mawhati lem bad u Bah James Sylliang uba dei u MDC jong ka Mawhati Constituency u la ia don lang ryngkat.
Kane ka rai ban khang tala noh ia katei ka company ri syiar ka dei halor ka nongrim ba kane ka company ka la pynkhein ia ki kyndon pynneh mariang.
U Bah James Sylliang haba ia ai jingmut ha katei ka jingialang u la ong ba mynta kala dei ban por ba ngin shu leh noh da ka kam pyrshah ia kane ka company namar “Ka Wah Umtrew ka dei kawei na ki tyllong umbam umdih jong kiba bun ki shnong hynrei ka rukom ri syiar kaba ym iahap bad ka jingstad saian da katei ka kompani kan lah ban wanrah jingeh ha ka koit ka khiah jong ki paidbah nongshong shnong ka thain”.
Shuh shuh u la pynpaw ruh ba “ngim dei ban salia wat ban khang khyrdep ne khang tala noh ia kane ka company namar kiba shah ktah kam dei eh ia ki shnong kiba don ha ka thain Umsning ne thain Mawhati hynrei kala ktah ia ka Ri Bhoi baroh kawei hi bad kumjuh ruh ia baroh ki nongleit nongwan kiba iaid lyngba jong ka shnong Umsning”.
Na ka liang jong ki rangbah shnong kiba la wan na ki shnong bapher bapher haba ia shim bynta ha ka jingialang kila pawpaw ba la dei ban por ban shim kam noh pyrshah ia kane ka company namar ba ka tyllong um kaba wan najan jong katei ka company kam long shuh ban pyndonkam ha ka bam ka dih.
Ka URPC ka la rai ruh ban pyntip lang sa sha ki nongmih khmat na ki ar tylli ki constituency kiba kynthup ia ka Umsning bad Mawhati kiba kynthup ia u Bah Donkupar Sumer MDC bad u Dr. C Lyngdoh u MLA jong ka Umsning bad kumjuh ruh ia u Bah JK Dorphang u MLA ka Mawhati ha ryngkat lang bad ia u Bah James Sylliang.
Ki shnong kiba la sha ktah lyngba katei ka tyllong um ki kynthup iaki shi phew tylli ki shnong ba kynthup ia ka shnong Nongjri, Umrnong, Umsning- Umsohlang Jagi Road, Lumniangdot, Umsning proper A bad Umsning Proper B, Syadheh , Syadrit, Patarim, Lumroman bad ka shnong Umsainar bad na ka bynta jong kine ki shnong la pyntikna da u Sub- Divisional Officer jong ka PHE ha ka kaipot ba u lah phah sha ka Deputy Commissioner jong ka Ri Bhoi ha kaba iadei bad ka jing jaboh jong kane ka tyllong na Wah Umtrew.
Kumjuh ruh ka King Edward VII Memorial Pasteur Institute and Medical Research Institute, Meghalaya kala pyntikna ba kane ka Um kaba wan na ka tyllong Wah Umtrew kam long shuh ban dih.
Kat kum ka jinglap ka jong ki hadien ba kila dep ban leh test kila shem ba kam pynhun satia ia ki namar namar ba ka jingdon jong u nar (Iron) ka long kaba khlain bha bad kumjuh ruh ka don ki khniang jingpang kaba ym long shuh ban dih ki briew ia kane ka um.(SP News)
