Rakhe Dap 9 Snem Ka JYF Da Ka Ba Synniang 5 Quintal U Khaw Sha Ki Khunswet

Jowai, Nailar 20: Ka Jaintia Youth Federation (JYF) Central Body mynta ka sngi 19th-Aug-2013 ka la dap 9 snem pura ha ka jingshakri jong ka ia ka imlang ka sah lang, ba naduh ba la suit la shor ia ka da ki nongseng kiba don ka jingiohi jngai bad ka jingsngewkhia ia ka jingma kaba ap ia ka ri bad ka jaitbynriew ba ha ka 19th-Aug-2004 ki la pynkha syndon ia ka JYF hapoh ka jingialam u Ma L.D Lakiang (founder President) bad u Ma Jinky Gassah (founder Secretary), Ma Sanio Siangshai (Vice President) bad u Lamitrei Lyngdoh (Finance Secretary) ha ka to ka por.

Na ka liang ka Seng hapoh ka jingialam u Samla Esterwis Ryngkhlem (Organising Secretary) JYF sengkmie, u Samla Niwasly Rymbai (President ka JYF-EJH) bad u John Pala (Secretary JYF-EJH) ki la leit jngoh ia ki khunswet ha sahsniang kiba don hapoh ka jingpeit jong ka NEIMA ban ia pyllut por bad ki ban ia kmen lang ha ka ne ka sngi khraw jong ka seng) da ka ba synniang haduh 5 quintal u khaw sha kine ki khunswet kiba dei ki para doh para snam jong ngi ki bym don kmie don kpa ne ba ha ing ha sem ong kitei ki nongialam.

Ha ka ne ka sngi haba ai jingkren na ka liang u samla Ester Ryngkhlem u ai ka jingiaroh ia ki nong pyniaid jong ka NEIMA kiba la aiti met bad mynsiem ban ai ka jingshakri kaba biang ia kine ki 25 ngut ki khunswet ba kin long kiba tip sngi bad ba dap ba biang kum ki kiwei pat ki khynnah kiba don kmie don kpa,

Kumjuh na ka liang u samla Niwasly Rymbai President ka JYF-EJH haba kren sneng bad kyntu ia kine ki khynna, phi dei barabor ban long ki  khynnah kiba sngewrit bad sngewnguh ia u Blei ba phi don ki nongpeit nong sumar kiba long palat ban ia ki kmie ki kpa kiba lah ban ai ka jingshakri kaba pynhun ia phi hangne naduh ka bam ka dih, ka jain ka nep bad kiwei kiwei de ki jingdon kam ba man ka sngi ha ka jingim jong phi.

Shuh shuh ha ka ne ka sngi ban ia shim bynta lang ban ia pynshngian ia ki ne ki hynmen ki para jong ngi na ka liang u samla John Pala Secretary JYF-EJH haba kren hangne u pynkynmaw ia ka sorkar ba ka dei ban krer lang la ka kti isynei sha ki ne ki khunswet kiba dang donkam shibun ka jingiarap la ha ka met ne ha jingim jong ki, ym ban ia lapmiet tang ha ka ia knieh suki bad pynkiew pynhiar shuki pynkut u kyrwoh na ka seng.(SP News)