TURA, Risaw 18: U myntri rangbah ka jylla u Dr Mukul Sangma mynta ka sngi u
la sam sa ia ki Tablet PC sa sha ki samla pule jong ka West GaroHills ha Tura. Baroh kiba la ioh ia kane ka jingai sngewbha na ka sorkar ki samla pule ki don haduh 2000 ngut.
Ha ka jingkren jong u myntri rangbah ka jylla, u la pynpaw ia ka jingsngewkmen ka jong u ba u ioh ia kane ka lad ban ai ia kaei kaei kaba ki samla pule kane ka juk kaba mynta ki don kam ha kane ka juk kaba mynta, u la ong ba kumba ka long mynta dang sah dien namar bay m tip ia kaei kaba jia sawdong jong ka pyrthei.
Kumba ka long mynta ka jylla Meghalaya ka dei kawei na ki jylla ha ka Ri India kiba la wan sha khmat ban pyntrei kam ia kum kane ka skhim. U la ong ba ka sorkar mynta ka dang pynkhreh ba baroh ki skul ha kane ka jylla kin ioh ia ka Wi-Fi khnang ba kane ka jinghikai kan long kaba jop.
U myntri rangbah u la ong ba kita kiba kam ialde ba ki dei ki nongialam da kaba khot ia ki pakhang shnong ha ka kyrteng jong ki samla pule, u la ong ba kane ka jingsam ia kine ki Tablet PC mynta ka sngi kan nym don jingmud lada ym lah ban pynioh ia ka shong suk shongsain. U la ong ba ka ILP kan nym iahap bad kane ka por kaba mynta ban iada ia ki rit paid ki don kiwei kiwei pat ki lad.
Ha ka jingkren jong u myntri ka tand ialehkai u Zenith Sangma u la ong ba dei ban kynmaw ba ka kam jong ki samla pule ka long ban pynleit jingmud ha ki kam pule ki jong kina ka bynta ban sain dur ia ka lawei ka jong ki.
U Parliamentary Secretary, Noverfield R. Marak bad Deputy Commissioner jong ka West Garo Hills Pravin Bakshi ruh ki la kren ha kane ka jingialang . Ha kane ka sngi ki khynnah ki la ia kmen kiba la ioh ia kane ka jingai na ka sorkar. (SP News)
