Shillong, Nailur 23: Kum ka jingbteng ia ka training Malaria kaba dang iaid mynta, ha kaba palat 60 ngut na ki thain Mawkyrwat ( 18 & 19 tarik Septermber 2013) bad kumba 20 ngut ha Mairang ha ka 23 tarik September 2013, ki Nongaidawai Kynbat/ Ki Nongkhem/ Ki Nongpynkhakhun, ka thain West Khasi Hills District, kiba long ki dkhot jong ka Society for Promotion of Indigenous Knowledge and Practices (SPIKAP), kiba hap hapoh ka Mawkyrwat C&RD Block and Mairang C&RD Block, ki la ioh ia ka jinghikai halor kumno ban iarap bad ban ai jingmut ia kiba katei ka jingpang Khieshoh Rih (Malaria) kaba long kawei na ki jingpang kaba ha Ri India dang ka dang khien ba ka long kawei na ki ba shyrkhei tam.
Ia kitei ka training la pynlong ha Mawkyrwat ( 18 & 19 tarik Septermber 2013) bad kumba 20 ngut ha Mairang ha ka 23 tarik September 2013, naduh por 9 baje mynstep haduh 3 baje janmiet, ba la pynlong bad pynbit pynbiang da i Kong M Suhkhlain, M&E/MIS Officer, na ka Caritas India, Futures Group International India Pvt. Ltd, Society for Promotion of Indigenous Knowledge and Practices (SPIKAP) bad ha ka jingiadon ryngkat ki Doctor bad ki Lab Technician, ki ba la wan ka tnad ka koit ka khia Dept of Health Sorkar Meghalaya, kiba la iarap ban pynshai halor katei ka phang Malaria, bad ruh ban hikai kumno pyndonkam ia ka rukom thew kaba kham kloi kaba ki ong ‘Rapid Test’ ban ioh jingtip halor ka jait Malaria kaba ki briew ki shitom.
Katei ka jinghikai ka la long kaba myntoi bha ia kitei ki Nongaidawai Kynbat/ Ki Nongkhem/ Ki Nongpynkhakhun kiba dei na ki thain kyndong jong ka thain Mawkyrwat, Mairang bad kiba long ki nongsumar tynrai na ki shnong kyndong.
Ha katei ka jinghikai nalor ki Doctor na ka tnad ka Koit ka Khia, ki officer jong ka Futures Group International India Pvt. Ltd, bad ka SPIKAP, la ioh jingkren ruh na u Bah John F Kharshiing, Co-Chairman, Meghalaya State Planning Board, bad Chairman, SPIKAP, ha kaba u la ai khublei kyrpang ia ki Nongaidawai Kynbat/ Ki Nongkhem/ Ki Nongpynkhakhun kiba la kyrshan ia ka koit ka khia sha ki thain kyndon. U la pyntip ia ki ba ka kumba ka long mynta ki bor KHADC (District Council) bad ki bor Sorkar ki la dep mynjur ia ka Ain kaba kyrteng ka The Khasi Hills Autonomous District Council (Protection and Promotion of Khasi Traditional Medicine )Act 2012, bad kumba long mynta ki dang pynkhreh ia ka ‘Rule’, ba la kyrmen ba katei ka Rule kan sa mih kham kloi, khnang ba kin ioh ia ka license kaban pynithuh ia ki da ka ain.
U Bah John F Kharshiing, Co-Chairman MSPB & Chairman SPIKAP, u la kyrpad ia ki nongsumar ba kin ia mih ryntih haba don ka jingialang jong ki nongsumar namar ka jingiatylli ka long ka jingshngain na ka bynta jong ki hi
U la kyrpad ia ki ban ki dei ban hikai ia ki khun ki pyrsa ia ka jingstad kaba ki la ioh na ki longshwa. U la kyrpad ruh ia ki ba ki dei ban shim ia kane ka jinghikai kaba ki ioh na ki Doctor na ka tnad ka Koit ka khia bad ban sam lem ia kane ka jingtip sha kiwei pat, khnang ba kin ioh ia ka jingtip kaba bniah kumno ban iakhun ia kum katei ka jingshitom kaba mih na u kain pyrjong. U la ong ba katei ka program kan dang bteng na ka bynta ki nongsumar tynrai hapoh ka jylla Meghalaya.(SP News)
