Tura Jymmang 9: Ki pulit jong ka jylla mynta ka sngi kila ioh ban kem ia ki san ngut ki kynthei kiba la set beain ia ki 12 ngut ki khynnah samla ha iing jong ki.
Kine ki 12 ngut ki khynnah kynthei kiba dang samla ym tang ba ki shah set beain, hynrei kila shah bom ha duh ba ka la jngem ka met ka phad jong ki khamtam eh ia ki bynta jong ka syngkai bad ki lybong.
Ia kine ki khynnah kynthei kiba dang samla la ioh ban pynlait na iing jong ka Jaynie Ningring N. Sangma ha Danakgre, kaba don sha rud jong ka shnong Tura. Kine ki khynnah kila shah set ha kane ka briew kumba 14 sngi ei ei.
Ia kine ki khynnah samla la leit ban kem da ki briew kiba kam ia lade ba ki dei ki seng bhalang da kaba pharep ia ki ba ki iaid ha ki kam awaria, na ka liang jong u heh pulit jong ka West Garo Hills u Mukesh Singh u la ong ba kin wad kilad ki lynti baroh ba kine ki khynnah kiba la shah bom haduh ban da jngem ki dei ban ioh ia ka hok ka jong ki.
Kine ki san ngut kiba la kem da ki pulit ba ki kynnoh kiba ia don kti ha kaba set baain ia kitei ki 12 ngut ki khynnah samla ki long ka Jaynie Ningring N. Sangma (37), Babiana M. Sangma (42), Merryln D. Shira (52), Konica S. Sangma (37), bad Lonavi R. Sangma (34).
Ia kine ki khynnah la pynlait da ki paidbah na ka iing jong ka Ningring D Sangma bad la rah ia ki sha ka jaka ba shngian bad pynpoi sha ki pulit. Ka jinglap ia kine ki khynnah dei na ka jingleit kai kawei ka briew ha iing jong ka Ningring.
Ki pulit kynthei jong ka Tura kila shim jingtohkit ia kine ki khynnah samla bad ha kane ka jingtohkit kila pyni ia ki dak mong ha khmat jong ki pulit ba kumno kila shah bom sha tied ha ka por ba ki shah set bain. Na ka liang jong ki pulit kila register case hapoh ka kyndon 365 jong ka IPC kaba mut ba ki shah rahbor.
Kine ki san ngut pat kiba la shah kem ha ki pulit kila kam ba kila ioh ia ka jingbit na u Deputy Commissioner jong ka West Garo Hills ban kyndang ia ki jaka ialeh awaria, katba na ka liang jong u DC jong ka West Garo Hills u la ong ba kin shu ai jingtip sha ki pulit bad ki dei ban ia leit lang bad ki pulit ha kaba leit ban kyndang.
Na ka liang jong u heh pulit u la ong ba kitei ki briew kim shym la leit ban ai kano kano ka jingthoh sha ki pulit , na ka liang jong ki pulit kine leh ia kane ka kam katkum ka ain bad kane ka long ka jingleh pyrshah ia ka hok jong ki kynthei. U tei u heh pulit u la ong ba kam dei ka kam jong ki seng bhalang bam kem briew ka long sha bar jong ka ain.
Kine ki 12 ngut ki khynnah kynthei pat ki la ong ba ia ki la rah na ki iing jong ki ha kaba ki kmie ki kpa jong ki ruh ki iohi ia kane ka jingshah rah ka jong ki, na pdengt jong kine kiba la shah kem ka la ar met mynta la hynriew bnai.
Kine kiba shah kem kila ong ba kila shah byrngem ba lada ki phet noh kin khot ia ki lehnoh GNLA ban siat iap ia ki .
Kine ki san ngut ki kynthei kiba la shah kem mynta ka sngi kila ong ba kila rah ia ki ban ai jingsneng ba ki dei ban kylla ba kin nym mlien ha ki kam awaria kila kynnoh kylla ia ki khynnah kaba ki la kem.
Ban lap ia ka jingshisha baroh na ka liang jong ki pulit mynta kin tohkit ia kane ka jingjia ban lap ia ki jingshah baroh namar kumba ka long mynta ka jingiakynnoh ka long mar kylliang.(SP News)
