Guwahati, Jymmang 30: U myntri rangbah duh jong ka Ri India mynta ka sngi u la shah jied biang kum u MP jong ka Rajya Sabha na ka jylla Assam khlem da don ba ialeh pyrshah.
U Dr Manmohan ba la 80 snem ka rta u la mih khmat ia ka jylla Assam kum u MP Rajya Sabha mynta la 21 snem naduh u snem 1991, ha ka por ba u la shimti ia ka kam kum u myntri pla pisa jong ka Ri India.
Ha kane election kaba la long mynta ka sngi u wei pat u kyrtong jong ka seng Congress u Santius Kujur ruh u la jop pyrshah ia u kyrtongjong ka AIUDF, ha kaba u la ioh 45 vote katba u Aminul Islam u la ioh tang 18 votes.
Wat hapdeng ka jingmih ha ki lat pathai khubor ba ka don ka jingiapaid ia pra hapoh ka seng Congress hynrei mynta ka sngi ka la pyni ia ka jingiatylli hapoh kane ka seng ha kaba u kyrtong ka seng u la jop da kaba suk.
Ha dien ba la pynbna ia ka jingniewvote na ka liang jong ki MLA bad ki myntri sorkar jong ka seng Congress ki la ai khublei ia u MP Rajya Sabha u ba thymmai. Ka jylla Assam ka don ar ngut ki ki MP Sha Rajya Sabha.
U myntri rangbah jong ka jylla Assam u Tarun Gogoi ha dien ba u la dep ban thep ia ka vote jong u la dep ban ong ba ki kyrtong jong ka seng Congress kin jop suk ha kane ka kynti kaba mynta. Naka liang jong ka seng AGP bad BJP ki khlem wan ia shim bynta ha kane ka jingiathep vote.
Ka jingiathep vote ka la sdang ha ka por 9 baje mynstep bad la niew ia ka vote ha ka por san baje jan miet. Ka por jong ki MP Rajya Sabha na Assam kan kut ha ka 14 tarik jong Nai Jylliew. (SP News)
