Shillong, Jymmang 16: Ka FKJGP Upper-Shillong Circle ka dap da ka jing sngew sarong sa shisien pat iala u jong u Nongialam President FKJGP Upper-Shillong Circle u Samla Kitboklang Nongphlang uba la shah jied bad ban sa shah pynkup burom ia u shen da ka Sorkar Kmie ha Nongbah Delhi lyngba ka Ministry of Youth Affairs & Sports, Govt. of India kaba la ai ka jingithuh kyrpang ia ka jingnoh synniang jong utei u samla Nongialam sha ka imlang ka sahlang la ka long ha ka koit ka khia, National Intigration bad kumjuh ruh ha ka liang jong Community Development. Ia katei ka jingpynkup burom ia u Nongialam jong ka Seng yn sa leh shen ha ka Nongbah Delhi da u President jong ka Ri India ha ka jingialang kaba yn sa pynbeit kyrpang da ki heh jong ka sorkar kmie ha ryngkat ka jingiadonlang kiwei pat ki kynrem ki lyndang.
Kaneka jingpynkup burom ka dei ka National Youth Award ha ryngkat u Silver Medal la phah da ka Shithi kum ka jing pyntip kaba kyrpang lyngba u Sudhir Kumar Joint Secretary Ministry Youth Affairs & Sports, Department of Youth Affairs, Govt. of India na Shastri Bhawan.
Kum ban shu pynkynmaw hangne ba u Samla Kitboklang Nongphlang mynta u bat kum u President jong ka FKJGP Upper-Shillong Circle naduh u snem 2005, uba dei ruh ha kajuh ka por u Information Secretary jong ka FKJGP East Khasi Hills District bad ha kajuh ruh ka por kum u Education Secretary FKJGP Central Body. Kane kadei ruh ka Award kaba Lai (3) kaba une u samla Nongialam (Kitboklang Nongphlang) un ioh pdiang na ki bor sorkar namar ha ka snem 2005-06 u la ioh pdiang ia ka khusnam 1. District Youth Leader Award (East Khasi Hills District), 2. State Youth Leader Award ka khusnam kaba la ai lyngba ka NYKS, Meghalaya Zone, Ka tnad kaba hap hapoh jong ka Ministry Youth Affairs & Sports, Govt. of India ia kaba la sam ha kito ki por mynba I Bah Aldous Mawlong I dang long I Director jong ka Directorate Sports & Youth Affairs, Govt. of Meghalaya bad kane ka Khusnam kaba une u samla Nongialam un ioh pat ha kane ka khyllip mat kaba mynta kan long kaba kham heh shuh shuh namar kadei kaba la wan beit lyngba ka Ministry Youth Affairs & Sports, Govt. jong ka Ri India ha kaba yn sa ai syndon da u President jong ka Ri India.
Ka Seng ka phah ka jing kyrkhu kyrdoh ia une u samla Nongialam ba lyngba kine ki Lai tylli ki Award kin long ruh kum Lai tylli ki Mawbyrsiew ki ban tei ia ka imlang ka sahlang bad ia ka Jaitbynriew hi baroh kawei, ka jing ioh khusnam jong u Samla Kitboklang Nongphlang ka long ka burom kaba khraw ym tang ia u hi shimet hynrei ka long ka burom ia ka ing ka sem, ka shnong ka thaw, ka Jaitbynriew, ka Seng bad ia ka Thain shatei lammihngi jong ka ri India hi baroh kawei.
Kane ka jing shah pynkup burom jong u Samla Kitboklang Nongphlang ha ka Sorkar India lehse kan dei ruh ka History ha ka Jylla bad ka ri India hi baroh kawei namar ba kham niar ba ki Nongialam kiba don ha ki kynhun ia kiba la tip kum ki pressure Group kin ioh ia ka jing ithuh kaba kyrpang haduh ban da ioh syndon kat ia katei ka Khusnam National Youth Award ha ryngkat u Silver Medal lyngba ki jingnoh synniang jong u sha ka imlang ka sahlang bad ia ka Jaitbynriew hi baroh kawei bad kan long ruh ka jing pynshlur ia kiwei pat ki Para Nongialam kiba don ha ki kynhun seng bhalang namar wat la une u samla u don ha ka kynhun jong ka seng kaba khlain bor ha ka jylla hynrei lyngba ka jing trei shitom ka jong u ban wad ki lad ki lynti wat ban long ruh kum uta u ksai khmat uba la pruid dak ia ka State Youth Policy ha ka Jylla Meghalaya.
Kyntang iawai ka seng kam don shuh da kiwei pat ki kyntien ban ai Khublei kyrpang iala u jong u Nongialam hynrei kum ka jing ai mynsiem ia kiwei pat ka seng ka sngew ba kane ka dei ka jingjop jong ka Jaitbynriew hi baroh kawei kaba wan lyngba ka jing trei shitiom. “Ka jingjop kadei tang kawei pat ka kyrteng JINGJOP, kaba ymlah satia ban ioh da kaba shu pan hynrei da kaba pyndonkam ia baroh ki thied ki jaw, ka bor pyrkhat lem bad ka mynsiem iakhun”.(SP News)
