Shillong, Nailur 02: Shuwa ba ka kynta pakhang shnong sa ki seng bhlang ban dawa na ka sorkar ba ka dei ban pyntrei kam ia la Inner Line Permit ha kane ka jylla, ki la don shibun ki jingjia ha kaba la pynshong syier ia ki paidbah.
Ha ka por sgiteng syian mynta ka sngi ki briew kiba ym lah ban tip ki la kawang petrol bom ia ka taxi kamai kaba don ia u number ML05E-0226ha Langkyrdieng bad ha kane ka jingjia u bomber jong kane ka kali u la duh.
Katba ki pulit SOT ki dang iaid pahara ia ka sor Shillong ha ka por shi baje shiteng miet ki pulit ki la ioh ban kem ia ki lai ngut ki briew na surok bah GS Road katba ki dang pyntyllun ia ki tyre kiba la thang da ka dieng sha Surok bah, kiba la shah kem ki long Wanlambok Wansai-21, Samllingstar Nonsiang-24, Esteliborn Khonglam-22 baroh ki dei na Mawlai Iewrynhep.
Katba ki pulit ki dang talasi ia ki kali kiba rung bamih ha kane ka nongbah Shillong ka por 12.30 baje shiteng miet ki pulit ki la kem ia u Bah Sankupar Lyngdoh-28, Walstar Nongdhar -28, Anthony Sangma-32, Balan Kharkongor -28, na hynniewmer namar ba ki la lap lai tylli ki bilor kiba la pyndap da ka Umphniang sharak.
Kine kiba don ha kane ka kali Maruti Van ML05-H-8838 ki la shah kem ha ki pulit. Na ka liang jong ki pulit ki don ka jingsuba kaba jur ba kane ka jingrah ia ka umphniang sharak ha ki bilor ka thew ba kine ki briew ki thmu ban leit thang ing shaei re shaei.(SP News)
