Shillong Nohprah 21: Arngut ki samla kila shah kem ha ki pulit halor ka jingdonkti ka jongki ban lute bad rahbor da kaba ak ialade kum ki pulit commando bad na kine la ioh kurup ruh ia ka pistol kai.
Kine ki arngut kiba la shah kem la tip kyrteng kum u Danny Dkhar (28) uba na Madanrting bad u Robert Kharsati (32) uba na ka shnong Smit kaba hap hapoh ka East Khasi Hills District.
U Additional Superintendent of Police (Crime), u bah Vivek Syiem haba iakren bad ki nongpathai khubor hynne ka sngi, ula ong ba ki pulit kila tohkit bniah halor artylli ki jingjia bad kila lap ksai ia ka jingdonkti kine ki arngut.
Ula iathuh ruh ba kine ki arngut kila ak ialade kum ki dkhot ka Special Operation Team (SOT) bad lute ia uwei u briew na Dhankheti ha ka 22 tarik u Naiwieng 2012 ha ka por 9.30 mynmiet. Ha kawei pat ka jingjia, kine kila rahbor ia uwei u nongniah kali tourist kaba don ia u nombor (ML 04B 0278) uba la tip kum u bah Pynshai Rymbai na Jaintia hills ha ka 8 tarik mynta u bnai da kaba pyndonkam da ka pistol kai.
U bah Syiem ula iathuh ruh ba ha ka jingtohkit ia kine ki arngut la shem ba kidei ki nongdih drok bad lyngba jong kine u John Baglary uba na Assam bad Zonglal Kipgen na Manipur ki ju khaii drok.Ki pulit kila ioh ruh ban kurup ia u drok Heroin uba la thep ha kawei ka tin uba shongdor T.17,000 bad la kurup ruh ia kawei ka TVS bike kaba khlem don ia u registration number plate na u Zonglal.
Une u heh pulit ula maham ruh ia ki paidbah ba kine ki arngut kidei kiba kiba donkti ha kiba bun ki kam sniew bad ula kyrpad ia ki paidbah ba lada ki don kiba la iatyngkhuh bad kine kidei ban mih shakhmat ban ujor sha ki pulit khnang ba ki pulit kin ioh ban leh ia kaba donkam.
Ia kine kiba la shah kem la pynngat ha ki kyndon ain kiba kynthup ia ka jingrahbor bad jinglut bad la pynngat ruh ha ka 27 (A) & 21 (A) hapoh jong ka NDPS Act bad ka iingbishar kala rai ban ai bor ia ki pulit ban tohkit san sngi kynthih.(SP News)
