Shillong, Jymmang 19: Ka kynhun ki nongthoh khubor na Shillong hapoh ka lama jong ka Meghalaya Union of Journalist (MUJ) ha ka jingialang kaba kyrkieh kaba la pyniaid da u Secretary u Raju Sharma ka la pynrem jur ia ka jingshah pyniap jong ki lai ngut ki nongtrei jong ka kot khubor Bengoli ka Dainik Ganadoot kaba la pynmih na Agartala.
Na ka liang jong ka MUJ ka kyntu ia ka sorkar Tripura ba ka dei ban wad bad pynshitom ia kine ki nongleh kam sniew. Ka jingpyniap ia ki nongtrei kot khubor ka pyni ba ki dei ki riew khlaw bad ki dei tang ki riew khawpud ong ka MUJ.
Kane ka jingshah pyniap jong ki lai ngut ki nongtrei kot khubor ka la jia mynta ka sngi ha ka por 3.30 noh phai sngi ha kaba ar ngut ki briew kiba ym lah ban ithuh ki la rung ha ka ophis trei kam jong ka Dainik Ganadoot ka kot khubor ha ka ktien Bengoli kaba mih na Tripura.
Kine ki briew la ong ba mar ia rung ha ophis ki la wad ia u Editor jong kane ka kot khubor u Sushil Chowdhury hynrei namar ba kim lap ia u ki la pom da ka wait ia ki lai ngut ki nongtrei haduh ba kin duh ei ia la ka jong ka jingim.(SP News)
