Shillong, Nailar 01: Ha ka ban iathuh-tang, kynmaw pyrto bad pruid dak ia ki jingtip ba kongsan kiba iadei bad ka Shnong Mawlai bad yn pyni ha ki dur ba im bad ba khih ia ki por barim bad ka jingsdang jong ka Shnong.
Ki nongshong shnong ba nyngkong bad ki jingjia ba kongsan ha ka mynnor, ki khana parom ba paw ka shnong nangta ki Bri Kur, ki Dong bad Kyntoit. Ki seng synshar shnong kum ka Mawlai Town Durbar, Mawlai Sports Club, ki jaka ki puta ki lum ki wah, ki kshaid, ki shyngyiar bad kumta terter. Nangta ki rukom shnong rukom thaw; ki kam ba ju trei ki briew mynshuwa, ka jingseng ia ki balang bad ki skul, ki riewpaw khmat ka shnong kiba la leit noh
Kine ki long ki katto katne ki pasoh jong ka Mawlai Documentary Film ka ban sa pynlait paidbah noh shen. Kine baroh na ka bynta ki nongshong shnong, ki skul bad jaka pule, ki Durbar Shnong, ki Library, Museum bad ki nongwad jingtip (researchers). Ka Community Documentation Committee (CDC) – Mawlai, ka documentary Film, yn pynlait paidbah noh shen kaba ki paidbah Mawlai ki la khmih lynti bha.
kane ka Film ka long kaba nyngkong eh ba la thaw na ka bynta kano kano ka Shnong la buria baikheng bad baiseng da ki paidbah ka Shnong Mawlai hi. Ka jingai khublei kaba khraw ka long ia baroh ki kiba la noh synniang. Ka CDC ka kyrpad namarkata ia baroh kiba la ioh ia ki shithi na ka, ba kin pyntip ia ka jinglong la kloi jong ki da kaba pynpoi ia la ki kyrteng ban ioh thep kyrteng ha ka Mawlai Documentary Film ha lane shwa ka 5 tarik Nailar 2013.
Ia kane ki lah ban leh da kaba pyntip lyngba kito kiba wan ai shithi . Kumta ka Mawlai kaba don hapdeng ka Thum Thum Heh bad Thum Thum Rit ka don ruh la ki jong ki jaka, ki jingtrei bad jingtrei ba pawnam ha baroh ki liang. Khadduh khadwai, ia kane ka Film yn pynmih paidbah da ka jingnoh synniang ki nongshong shnong kiba ieit bad sngew sarong ia la ka shnong Mawlai.(SP News)
