Shillong, Nohprah 05: Ka kynthun trei kam kaba lai jong ka Meghalaya State
Planning Board (MSPB) mynta ka sngi kala shong ban bihsar bniah ia ka jingpynlut pynsep jong ki lai tylli ki Autonomous District Council ia ka pisa kaba la ai sha ki na ka Plan Skhim.
Ha kane ka jingialang kaba la long mynta ka sngi la shim ia ka rai ba kin ia kynduh biang ha u kyllalyngkot jong u snem 2014 ban ia kren kham bniah ha kaba iadei bad ki ain kiba ia dei bad ki riti ki dustur na ka bynta ban dup lah ban buh ryntih ia ki ain kiba ia dei bad ki kam pyniaid shong pyniaid hima sima.
Haba ia dei bad ka jingia bhah ia ka pisa ka long ba ka dei ban ia shai bha katno la lum ia ka pisa bad katno ki District council ki dei ban ioh ia ka bhah ka jong ki namar kumba ka long ki district council ki ia kynduh jingeh ha ka liang ka pisa pilain. Ha ka juh ka por ruh kumno ban leh na ka bynta ban pynbha ia ka rukom ban pynmih pisa.
Ha kane ka jingialang la ia kren ruh kumno ban kham leh sani ha kaba ai ia ka jingkhein sha ka sorkar ha kaba ia dei bad ka jinglut jingsep bad ba dei ban thung shuh ia ki nongbishar ha ki District council namar kumba ka long mynta ki mukotduma ki la sah teng palat.
Na ka liangjong ki District council kin hap ban ai da ka jingthoh ha ka jingiakynduh kaban sa long ha u snem ban wan. Ia kane ka jingialang la pyniaid da u Bah John F Kharshiing ba la ia don lang ruh bad kiwei ki dkhot lemb a dki heh sorkar.(SP News)
