Jowai, Jymmang 09: Ka Dorbar Shnong Wapungskur kaba dei ka shnong kaba tih bad pynmih dewiong nyngkong eh ha Jaintia Hills, ha ka dorbar ba dang shu dep long shen jong ka, da kawei ka jingmut ka la shim ia ka rai ba ka shnong Wapungskur hi baroh kawei ka sngewkhia haduh katta katta eh ia ka hukum khang tih dewiong ba dang shen jong ka National Green Tribunal namar kane kan ktah ia ka jakpoh jong ki lak ki lak ngut ki briew ki ba im jakpoh na ka jingdon jong u dewiong ha Jaintia Hills.
“Ngi kum ka dorbar shnong Wapungskur, ngi pynpaw ia ka jingsngewkhia ka ba haduh katta katta ia kane ka rai jong ka NGT ban khang jyndat ia ka jingtih dewiong ha ka jylla Meghalaya. Kane ka rai ba kyrkieh jong ka NGT ba donburom kan wanrah ia ka jingkylla na ka jingkmen sha ka jingsngewsih kthang bad jingiam briew hapdeng u paidbah nongshnong shnong jong ka Jaintia Hills.” ong u Bah Satly Ryngkhlem, Rangbah Shnong jong ka Shong Wapungskur.
“U Bah Ryngkhlem u la ong shuh shuh ba ka NGT ka la dei ban pyrkhat sani bha ha shwa ba kan shim ia kane ka rai ba jyndat jong ka, da kaba phai sha ki lak ki lak ngut ki nongshnongshnong jong ka jylla Meghalaya kiba im jakpoh na u dewiong. Ha ka jingshisha kane ka iing bishar ba don burom kam dei ban shim jyndat ia kaba kum kane ka rai hynrei ka dei ban ailad shuwa ia u paidbah ban pyrkhat sani bha ia kane bad lada dei ban pynkyhlla ia kane ka rukom tih dewiong kaba mynta ruh dei ban ai shuwa da ka jingmaham (warning) ia u paidbah hynrei ym ban shu khang syndon hi noh kumne tdam”.
Kane ka jingleh kyrkieh jong ka NGT kan ktah ym tang ia lak ki lak ngut kiba im na u dewiong hynrei kan pyndkoh ruh wat ia ka sorkar jylla (Meghalaya). Ym tang katta, hynrei lada yn khang jyndat shisha ia u dewiong, da ki lak ki lak ngut ki nongshnongshnong jong ka jylla Meghalaya kin shah thngan bad kaba mih nangne, kan long ba yn sa jyllei tang ki nongtuh nonglute bad ki riew runar namar ban pyndap la ka jakpoh, ka bym banse ka thom ia ka sang namar la tip shai kdar ba ka sorkar India lane Meghalaya kan ym lah da lei lei ruh em ban ai kam lut ia baroh kito ki ban sa shah ktah na ka jingkhang tih dewiong.” ong shuh shuh u Bah Ryngkhlem.
“Ka Dorbar Shnong Wapungskur namar kata ka daw, na ka bynta ka iap ka im jong upaidbah jong ka Ri Lum Jaintia, ka kyrpad ia ka NGT ba kan weng noh ia kane ka hukum ba kyrkieh jong ka hynrei ban ailad ia u paidbah ba im kumba u jiw long ha ki por kiba la dep. Ka dorbar shnong Wapungskur ka kyntu ruh ia ka sorkar ban iasaid kat balah na ka bynta ka jingmyntoi jong u paidbah jong ka jylla”, pynkut u kyrwoh na ka Dorbar Shnong Wapungskur.(SP News)
