Shillong,rymphang,13: Ki san tylli ki sengbhalang ka Ri lum Jaintia ki ba kynthup ia ka AJYWO Sengkmie, KSU-Jaintia Hills District Unit, FKJGP-Khliehriat Circle bad HNYF-East Jaintia zone bad ka Synjuk Rangbah Shnong-East Jaintia Hills ha ka jingiakynduh ba kyrkieh jong ki mynta ka jan miet ha Khliehriat hadien ba la wai ka pakhang shnong ba 12 kynta ba ki la khot pynlong mynta ka sngi naduh 5 baje mynstep haduh 5 baje mynmiet ban pynbor ia ka sorkar ban maramot ia ka surok NH44.
Ki la pynpaw ia ka jingsngewnguh jong ki shi katdei eh ia ki paidbah baroh jong ka EJHD bad ruh jong kiwei pat ki jylla ha ka thian Shatei-Lammihngi jong ka ri India namar ka jingiasnoh kti lang bad ruh jingkyrshan ba pura jong ki ia ka pakhang shnong jong kitei ki san seng kat haduh ba ka la long kaba iaid beit iaid ryntih bad ruh kaba jop mynta ka sngi.
“Ngi ngeit skhem ba da ka jingjop jong kane ka pakhang shnong ba ngi la khot mynta ka sngi, ka sorkar ka la iohi bad ruh ioh sngew ia ki mat jingdawa jong ngi, ki ba dei na ka bynta ka bha ka miat jong u paidbah nong leit nongwan lyngba ka NH 44” ong u Bah SS Niangti, General Secretary ka KSU-JHDU.
U Bah Julius Nongtdu, President ka HNYF-EJZ u la ong “Ngi pynpaw ruh ia ka jingsngewnguh bad ruh ngi ka jingkhublei ba kyrpang ruh ia ki bor district bad ruh ki pulit jong ka EJHD halor ka jingiatrei shitom jong ki da kaba peit bad khmih bniah ba ka pakhang shnong jong ngi ka la long kaba iaid beit iaid ryntih khlem kano kano ka jingjia ba sngewsih. Da ka jingiasnohktilang jong ki, ki riewsniew kim shym la ioh lad lane nud ban shim kabu ei ei ruh em ha kane ka pakhang shnong jong ngi”.
“Ngi pynpaw ia ka jingsngewnguh bad ruh ngi ai khublei kyrpang ia ka Jaintia Hills Truck Owners’ Association (JHTOA) bad ia ka seng 9-Shnong namar ka jingkyrshan ba pura jong ka ia kane ka pakhang shnong jong ngi kat haduh ba ka la long kaba jop” ong shuh shuh ki nongialam jong ki san seng”. Ong u Bah WT Rymbai, President ka FKJGP-Khliehriat Circle.
“Ngi pynpaw ia ka jingsngewnguh bad ruh ngi ai khublei kyllum lang naduh ka mynsiem ia baroh ki Rangbah Shnong bad ruh ki paidbah shynrang bad kynthei baroh jong ka EJHD bad ruh jong ka Jylla ba Shatei lammihngi jong ka Ri India namar ka jingkyrshan ba pura jong ki ia kane ka pakhang shnong jong ngi kat haduh ba ka la long kaba jop mynta ka sngi” pynbud sa u Bah C.Rymbai, President ka SRS-EJH.
“Khatduh eh lyngba une u kyrwoh, ngi pyntip sha ka sorkar ba lada jia ba ka sorkar kam sngap ia ka jingdawa jong ngi, ngin pynjur shuh shuh ia ka jingiakhih jong ngi nangne sha khmat mar ia kut ka Election MDC” Pynkut u kywoh na ki san seng.(SP News)
