Shillong, Lber 10: Ban thung ia ki myntri hapoh jong ka sorkar ka shong ha ka kti jong u myntri rangbah ban jied ia ki briew kiba u mon hynrei ha kane ka kynti kaba paw shai kdar ba hapoh jong ka sorkar Congress hap ban ioh ia ka jingbit na ki nongialam jong ki bahalor jong ka seng.
Ha kine ki sngi kiba u myntri rangbah ka jylla u Dr Mukul Sangma u don sha Delhi ban ioh ia ka jingmynjur n aka Sonia Gandhi ka khliehduh jong ka seng Congress bun na ki MLA jong ka seng Congress ki la leit sha Delhi ban ia khroh ba kin ioh minister.
Na ka liang jong u Dr Mkul Sangma bad ki heh jong ka AICC ki la ia shong bun sien ban iohi ia ki briew kiba dei ban long minister, ha dien kata la shim ia ka rai bad u Dr Mukul mynta ka sngi u la wan phai sha Shillong rygnkat bad ki kyrteng jong ki myntri.
Wat la ia ka kyrteng jong ki myntri haduh mynta dang buhrieh, hynrei la ioh jingtip ba ki kyrteng jong ki MLA kiban ioh shuki minister ki lah ban dei u Dr RC Laloo, u Bah Sngewbhalang Dhar, u Bah AL hek, u Bah HDR Lyngdoh, Bah Rowell Lyngdoh, Bah Prestone Tynsong, ka Ampareen Lyngdoh, u Clement Marak, u Zenith Sangma , ka Debora Ch Marak bad ka la don ka jingiakren la yn ioh u Dr Celestine Lyngdoh lane u Bah Julius Dorphang.
Na ka liang jong u Dr Mukul Sangma la shai ka sngi yn leit ban ai ia ki kyrteng sha u Lat jong ka jylla ban kyrpad ia u bay n pynsmai ia ki MLA kum ki myntri kiba don lang ha ka sorkar jong u.(SP News)
