Shillong, Nohprah 05: Ki shiphew ngut ki MLA jong ka seng Congress ki la ioh ia ka skhim shna surok kaba kyrpang ia kaba la mang da ka sorkar pdeng. Ia kane ka skhim la tip kum ka “ Special Central Assistance”. Ka pisa na kane ka skhim ka la kot sha ka T.43.95 klur.
Katkum kot kaba la ioh da u SP News Agency ia kaba la ai kyrteng “Proposals Under Special Central Assistance) na ka bynta jong u snem 2012-2013 ka la kdew shai kdar ba ka Mawkyrwat Division ka ioh T.82.1
970 lak na ka bynta ban shna ia ka surok na Mawkyrwat sha Pyngdengsakwang bad T.85 lak na ka bynta ban shna ia ka surok na Nongshillong sha Mawthong.
Ka Ampati Division T.3300 lak, ia kane ka pisa la phiah ha ki lai bynta, na ka bynta ban pynbha ia ka Amapti la mang T.1000 lak , na ka bynta ban shna ia ka surok na Ampati sha Melim bad saw tylli ki jingkieng la mang T.1200 lak bad na ka bynta ban siangrong ia ka surok na Betasing sha Isaguri la mang T.1100 lak.
Ka Jowai NEC Division pat ka ioh T.125 lak ban shna ia ka surok ban pynpoi sha ka shnong Tongseng, na ka bynta ban shna ia ki surok hapoh jong ka shnong Tluh pat la mang 119.7200 lak, Ban siangrong ia ka surok ban leit sha Tuber-Kamaishnong lamang T.387 lak.
Ka NH Shillong Division ka ioh T.76.5400 lak na ka bynta ban shna ia ka surok na na Nongpiur ban pyniasoh bad ka surok bah NH-40, ka Shillong South Division ka ioh T.50 lak na ka bynta ban shna ia ka surok sha Kyndong Mylliem. Na ka bynta ban shna ia ka surok na Pynursla- Myllat Nongkhlieng ka ioh T.60 lak.
Ka sohra Division ka ioh T.49.8030 lak naka bynta ban shna ia ka surok Mawkma-LaitlyngdopRngimawsaw, ka NH Bye Pass pat ka ioh T.30 lak ban shna ia ka surok ha Umkdiat Nongmynsong bad ban pynbha ia ka surok Lumshyiap ka ioh T.30 lak.
Haba la khien ia ka pisa kaba la wan na ka sorkar pdeng lyngba ka Special Central Assistant ka la poi sha ka T.4395.26 lak, na kane ka pisa kaba bun tam ka dei hapoh jong ka Amapti Division, kane ka division ka la ioh haduh T.3300 lak.
Ha kane ka kot kaba la ioh da u SP News, ha ka bynta kaba la thoh “Remarks” ka la paw ka kyrteng jong ki MLA Congress suda baroh, kine ki kyrteng ki long u Bah Rowell Lyngdoh, Bah Shitlang Pale, Bah RV Lyngdoh, ha kaba ka kyrteng jong u ka la paw ar sien, u Bah P. Tynsong, u Dr PW Khongjee bad u Bah AL Hek ha kaba ka kyrteng u Bah Hek ruh ka la paw ar sien bad kane ka paw ba dei tang ki MLA Congress kiba ioh ia kane ka skhim SCA .(SP News)
