SHILLONG, 31 JULY: Ka dong shatei lam mih ngi jong ka Ri India ka don khyndai tylli ki University kiba dei jong ka sorkar pdeng. Ki nonghikai ha kine ki skul bah jong ka sorkar pdeng ki sngew ba ka la don kam ia ki ban don ia ka seng kaban peit ia ka khia ka shong ka jong ki bad ha ka juh ka por ban ia don ka jingsngew jan para ma ki.
Ban pynurlong ia katei ka jingthmu ka jong ki, na ka por sha ka por ki la juhia kynduh ban ia kren ia kane ka kam. Ha ka dien ka jingia phylliew jingmud ki la lah ban pynmih ia kane ka seng ia kaba ki la ai kyrteng da ka North-East India Confederation of Central University Teachers’ Associations (NEICCUTA).
Kane ka seng ka la jied ia ki nongkit kam kiba nyngkong ha kaba u Prof Xavier P Mao, President jong ka NEHU Teachers’ Association u la shah jied kum u Chairman u ba nyngkong bad u Dr Prasenjit Biswas la jied ia u kum u general secretary.
Kiwei ki nongkit kam ki long u Prof Bijoy K Danta jong ka Tezpur University , u Prof G S Solanki na ka Mizoram University kine ki long kum ki Vice Chairman bad ki dkhot jong ka Executive Committee ki kynthup ia u Dr Tapas Medhi (Tezpur), Dr E Kangaraj (Mizoram) bad kiwei ki nongkit kam ki long na ka Sikkim University, Rajiv Gandhi University, Nagaland University, Assam University, bad Tripura University.(SP News)
