Shillong,Rymphang 16: Ka seng Achik Peace Volunteers Council (APVC)ka kynhun trei mon sngewbha ha Garo Hills kaba la seng ia ka na ka bynta ban wanrah ia ka jingsuk sha ki lum Garo kala thoh sha ka u secretary jong ka tand kam poh iing jong ka sorkar pdeng bad ka la ong ba ka jingiakren ia suk bad ki lehnoh ha Garo Hills ka long sha bar jong ka Riti synshar jong ka Ri India.
Ha ka jingwad bniah jong ka APVC ka shem ba kine ki seng lehnoh ha Garo Hills kila leh ia ki kam sherkhei da kita kiba kam ia lade ba ki dei na ka seng ,GNLA, ANVC (B), UALA, LAEF, ATF, ANLCA bad bun kiwei kiba dang mih.
Kane ka seng ka la ai jingkhein ba ha u snem 2013 ki seng lehnoh ha Garo Hills kila shim ia ka jingim jong ki briew haduh 38 ngut bad na kine 7 ngut ki dei ki pulit bad 31 ngut ki dei ki riew paidbah.
Ha une u snem 2014 ki seng lehnoh ha Garo Hills kila shim ia ka jingim jong ki briew haduh 6 ngut bad rah bor ia ki 7 ngut ki riew paidbah. Ka APVC ka kynnoh ba kane ka jingpyniap ia kiba lului ka dei ka jingtrei ka jong ki tang ban ioh lum pisa na ki briew kiba la trei shitom.
Ha kane ka shithi kaba la thoh mynta ka sngi sha u Secretary ka kam poh iing jong ka sorkar pdeng u Anil Goswami ka seng APVC ka ong ba ka jingiakren ia suk bad ki lehnoh ha Garo Hills ka long sha bar jong ka Riti synsahr jong ka Ri India.
Na ka liang jong ki dkhot jong ka APVC ki ong ba kin nym shong thait ban trei na ka bynta ban wanrah ia ka jingshong suk ha Garo Hills. La ong ka khubor kaba la pynlait da katei ka seng.(SP News)
