Thoh ka CSWO sha u DGP ban thad paidbah ia ka shithi kynnoh bamsap ka CBI ha Meghalaya

Shillong, Nailur  30: Ka kong Agnes Kahrshiing  president jong ka seng CSWO mynta ka sngi ka la thoh sha u Director Genenral ki pulit jong ka Jylla ban dawa na u ba dei ban thad paidbah ia ka shithi kaba la phah da ka CBI sha ka ka sorkar jylla halor ki jingkynnoh ba ka la don ka jingiabamsap ia ki skhim jong ka sorkar pdeng ha kane ka jylla.

Ha ka juh ka por na ka liang jong ka CSWO ka kwah ruh ban tip aiu la leh da ka sorkar jylla halor ki shithi kiba la thoh da ka CBI ka tand tohkit jong ka sorkar pdeng ha kaba ki la don ki kyrteng jong ki nongialam seng sain pyrthei bad ki heh sorkar.

Ha kane ka shithi na ka CSWO ka la kdew ba ka CBI ka la lap ia ka jingthep pisa jong ki nongialam seng sain pyrthei bad ki heh sorkar ha ki Bank da ka Financial Investigation Unit ka long kaba la sherkhei ha kane ka jylla Meghalaya.

Na ka liang jong ka  CSWO, ka la ioh ia ka lad ban leit sha ka ophis ba ha khliehduh jong ka CBI ban pynshisha halor katei ka jingkynnoh jong ka seng bad la pynshisha ba la don ki shithi kiba la phah na katei ka ophis sha ka sorkar jylla Meghalaya kaba la ai thoh sha U DGP bad Chief Secretary jong ka jylla bad kitei ki shihithi ki thoh ba dei ban thohkit. Halor ki skhim jong ka sorkar pdeng kiba pyntrei ha kane ka jylla Meghalaya.

Na ka liang jong ka CSWO ka la ong ba na ka liang jong u (DGP) yn ia mynjur ba ka ain ka long  kumjuh ia baroh khlem da niew ba heh ne barit bad na ka liang jong ki pulit haba ki ioh ia kum kine ki jingthoh ki dei ban register mukotduma hapoh ka ain Prevention of Corruption Act hapoh ka kyndon n 13 jong kane ka ain  Prevention of Corruption Act, ka kren shai kdar ba u shakri sorkar ka dei ban tohkit .

Na ka bynta ka jingtip jong u paidbah na ka liang jong ka sorkar ka dei ban thad madan ia ki kyrteng jong ki IAS bad ki nongialam seng sain pyrthei kumba la kdew ha ka shithi jong ka CBI. La ong ba ka sorkar ka dei ban ailad ia ka CBI ba kan tohkit.

Ia kane ka shithi na ka liang jong ka CSWO ka la phah ruh sha ka u Director, jong ka CBI, New Delhi. Sha u  Chief Secretary, ka sorkar  Meghalaya bad sha u  IG CID, ka sorkar Meghalaya.(SP News)