Shillong, Naitung 15: Ka seng Federation of Khasi Jaintia and Garo People (FKJGP) mynta ka sngi ka la phah ia ka dorkhas sha u myntri rangbah ka jylla ban kyntu ia u ba u dei ban mang pisa kaba biang na ka Special Plan Assistance ban pynkylla ia ka Ing u Tirot Sing sha ka Museum kaba don ha Nongkhlaw.
Na ka liang jong ka seng ka la ong ba man u snem ka sorkar ka juh rakhe ia kane ka sngi iap jong u tei u khla ka wait ha ka 17 tarik jong mynta u bnai u ba la ia khun da ka thma pyrshah ia ki phareng ha u snem 1829. Ban ai ka burom kaba kyrpang ka sorkar ka dei ban pynkylla noh ia katei ka jaka sha ka museum.
Ka FKJGP ka sengew ba ia katei ka iing ha Nongklaw ia kaba la tip kumka “Khasi Patriotic Home” la dei ban pynbha bad pynitynnad ia ka khnang ban lah ban buh ia ki jingthoh jingtar ki dur ki phlim kiba kren halor ka jingim jingman jong u tei u khla ka wait u ba la ialeh ban ia khun pyrshah ia ki phareng.
Lada ka sorkar ka leh ha katei ka rukom kan khring ia ki briew kiba na bar jong ka Rib a kin wan sha kane ka jaka kiba kwah ban tip kham bha ia ka jinglong jingman bad ia ki kam kiba u tei u syiem ba khraw jong ka Ri Khasi u la leh.
Ka FKJGP ka la pynkynmaw ha kane ka dorkhas ba dei ka seng FKJGP kaba la ialeh ban pynioh ia ka jingiarap na ka skhim MLLAD ha ka por jong u Bah G G Swell u ba la bam kwai ha dwar u blei ha kaba la lah ban shna ia katei ka iing kaba don mynta. Ban pynbha shuh shuh ia ka ka sorkar ka dei ban wan sha khmat ban bei pisa na ka bynta katei ka kam ban pynkylla museum ia ka “ Khasi Patriotic Home’ kaba don ha Nongkhlaw.(SP News)
