Shillong, Nohprah 04: U myntri rangbah ka jylla u Dr Mukul Sangma mynta ka sngi u la thoh sha u myntri rangbah duh jong ka Ri u Dr Manmohan Singh ban kyrpad ia u ba un iarap lem ia ka jylla Meghalaya ba kan dup lah ban kiew lem kum kiwei ki jylla ha kane ka Ri India, u myntri rangbah u ba kyrpad ban pdiang len ia kane ka jingpan jingiarap.
Ha kane ka shithi na ka liang jong u myntri rangbah ka jylla u la pynkynmaw ba u la dep ban ai ia ka dorkhas sha ka sorkar pdeng ban pan ia ka jingiarap kaba kyrpang na ka bynta ka jylla Meghalaya, ha kane ka shithi la ong ba u pynkynmaw biang ia kane ka jingpan kaba la long kham mynshuwa kaba la dai ka da Dorkhas. Lada kane ka jingiarap kaba kyrpang yn ai sha ka jylla Meghalaya kan long ka jingkyrkhu.
Ha ka juh ka por na ka liang jong u myntri rangbah ka jylla u la pynpaw ia ka jingsngewnguh ia u myntri rangduh jong ka Ri ba ka sorkar pdeng ka la shim ia ka rai ban pynheh ia ka surok na Srirampur West Bengal sha Nongstoin hapoh ka jylla Meghalaya lyngba ka NH 127 (B) da kaba iaid lyngba jong ka Dhubri (Assam).
Kane ka surok ka long kaba don kam haduh katta katta namar kan iarap ban pynkylla ia ka ioh ka kot jong ka jylla ha kine ki jylla kiba shaniah ia ka kit ka bah ha ki trok. Kane ka surok ka long kaba don kam palat na ka bynta kane ka jylla Meghalaya bad u la kyntu ia ka sorkar pdeng ban sdang noh ia kane ka jingtrei.
Kawei pat kaba kongsan ka long ba ka jylla Meghalaya ka don kam kyrkieh ban don noh ia ka lynti rel ka ban pyniasoh na Agia sha Badarpur ha Assam lyngba kane ka jylla Meghalaya da kaba iaid na khappud bad ka Ri Bangladesh bad pyniasoh ia baroh ki kad khaii ha kane ka jylla bad poi sha Barak Valley ha Assam da kaba pyniasoh ia ka jylla Tripura, Mizoram. U Dr Mukul u kwah ba ka sorkar pdeng kan sdang noh ia kane ka lynti rel.(SP News)
